Ia huq Kurti: Për qytetarin nga Kosova që u lirua para gati një viti, mendon që po mbahet ende në burg në Serbi
Kryeministri i Kosovës, Albin Kurti duket se nuk është i informuar për të arrestuarit kosovarë nëpër kufinj nga Serbia.
Këtë e la të kuptohet gjatë një deklarimi të tij sot në mbledhjen e Qeverisë, ku deklaroi se qytetari Petrit Dula, bashkë me Nezir Mehmetajn, po mbahet në burgjet e Serbisë.
“Kjo nuk është hera e parë, kjo është sjellje e qëllimshme e dashakeqe e Serbisë që bie ndesh me konventat ndërkombëtare. Serbia mban në paraburgim edhe Petrit Dulën e Nezir Mehmetajn, gjoja për krime lufte. Nezir Mehmetaj ka qëndruar për muaj të tërë pa aktakuzë. Petrit Dula vuan burgimin bazuar në vendimin e gjykatës përkundër që dëshmitari në rastin e tij ka mohuar që Dula është autor i veprës edhe kur është marrë në pyetje nga autoritetet në Podgoricë.” – tha ai në mbledhjen ne Qeverisë.
Por, Dula është liruar para gati një viti. Këtë e kishte konfirmuar ai në një bisedë me “Dukagjinin”.
“Po, jam liruar më shtatë prill (2023), ndërsa jam arrestuar më katër qershor të vitit 2022.” – kishte thënë ai.
