Haradinaj viziton Pentagonin, kërkon anëtarësimin e Kosovës në NATO
Kryetari i Aleancës për Ardhmërinë e Kosovës (AAK), Ramush Haradinaj, ka zhvilluar një vizitë në Pentagon, ku është pritur në takim nga Alton Buland, Drejtor Kryesor për Evropën dhe Politikat e NATO-s në Zyrën e Sekretarit të Luftës së SHBA-së.
Gjatë takimit, Haradinaj ka shprehur mirënjohjen e Kosovës ndaj popullit dhe shtetit amerikan për mbështetjen e vazhdueshme, duke theksuar se tani është momenti i duhur për anëtarësimin e Kosovës në NATO.
Ai ka nënvizuar se Ushtria e Kosovës do të qëndrojë gjithmonë krah për krah me Ushtrinë e Shteteve të Bashkuara të Amerikës dhe me ushtritë e vendeve anëtare të Aleancës Veri-Atlantike.
