Guvernatori i BQK-së në takim me Rashiq: Rregullorja e re nuk e ndalon pranimin e mjeteve në euro
Guvernatori i Bankës Qendrore të Kosovës, Ahmet Ismaili është takuar sot me ministrin për Komunitete dhe Kthim, Nenad Rashiq.
Në këtë takim është diskutuar rreth rregullores së re të BQK-së.
“Gjatë takimit po ashtu është diskutuar edhe për mundësitë ekzistuese, alternativat dhe qasjen në financa përmes kanaleve të ndryshme financiare të licencuara për operim në të gjithë territorin e Republikës së Kosovës.” – thuhet tutje në një komunikatë të BQK-së.
Sipas Ismailit, rregullorja në fjalë nuk ndalon apo kufizon pranimin e mjeteve në llogaritë bankare përmes euros.
“Për më tepër, u sqarua se Rregullorja në fjalë nuk ndalon apo kufizon pranimin e mjeteve në llogaritë bankare në Euro në bankat e licencuara dhe as nuk kufizon aktivitetin këmbimor të cilësdo valutë që kryhen nga institucionet financiare bankare ose jo-bankare të licencuara nga BQK. Andaj, të gjithë individët, kanë qasje në llogari bankare dhe mund të pranojnë mjete në llogaritë e tyre në Euro, përmes kanaleve të ndryshme ligjore.” – shkruan mes tjerash.
Guvernatori Ismaili raportohet se ka thënë që në katër komunat veriore, operojnë katër degë bankare, tri institucione mikro-financiare dhe mbi 15 institucione financiare jo-bankare.
“Gjithashtu, Guvernatori Ismaili e njoftoi Ministrin Rashiq se vetëm në katër komunat veriore, operojnë katër degë bankare, tri institucione mikro-financiare (kredidhënëse) si dhe mbi 15 institucione financiare jo-bankare për pagesa dhe këmbimore. Numri i degëve dhe zyrave të institucioneve financiare që operojnë në atë zonë është në rritje, pasi përfshirja financiare është objektiv i BQK-së.” – bëhet e ditur mes tjerash.
