Gazetari Vitija: Shkarkimi i kryeinspektorit është hi syve, duhet marrë masa për ata që fshehën rastin
Gazetari, Bujar Vitija, ka reaguar pas shkarkimit të u. d. kryeinspektorit të Inspektoratit Shëndetësor, Shaban Osmanaj, pas raportimeve se një foshnje e vdekur ishte vënë në rrobalarëse në Spitalin e Pejës.
Vitija përmes një postimi në Facebook, ka thënë se shkarkimi i Osmanaj është hi syve për rastin në fjalë dhe sipas tij ky skandal nuk mbulohet me kaq.
Sipas tij për këtë rast duhet me marrë masa për ata që e fshehën rastin.
“Shkarkimi i kryeinspektorit është hi syve për rastin e copëtimit të foshnjës në rrobalarëse në Spitalin e Pejës. Ky skandal nuk mbulohet me kaq. Është marrëzi me besu se po e mbroni “dinjitetin e pacienteve”, derisa nuk merrni masa për ata qe e fshehën rastin. Mbrojtja e këtyre të fundit është shumë e çuditshme! Cili është interesi? Kjo e thellon skandalin dhe ju bën juve përgjegjës!”, ka reaguar Vitija.
