Gashi: Nesër i them emrat e personave të dyshuar në zhdukjen mostrave të Astrit Deharit
Avokati i familjes Dehari, Tomë Gashi, ka treguar se ai i di emrat e atyre që kanë punuar në laboratorin e toksikologjisë në Prishtinë, ku janë zhdukur mostrat Astrit Dehari.
Gashi ka thënë për “Albanian Post”, se sot nuk mund t`i publikojë emra sepse një veprim i tillë mund të ndikojë në procesin e hetimeve.
Megjithatë, ai ka thënë se emrat do t`i publikojë nesër.
“Unë i di emrat, por nuk mund të them se i prishi hetimet. Emrat kanë me dalë nesër, po ne nuk mundemi me i qitë para se policia dhe prokuroria me tregu, se ne po besojmë që dikush duhet të ndalohet”, ka thënë Gashi.
Ministrja e Drejtësisë, Albulena Haxhiu, sot ka njoftuar për zhdukjen e mostrave të Astrit Dehari, aktivistit të LV-së, i cili është gjetur u vdekur në burgun e Dubravës në vitin 2016.
Kryeprokurori i Shtetit, Besim Kelmendi, ka bërë të ditur se e ka njoftuar Prokurorinë Speciale dhe Policinë për këtë rast.
“E kam njoftuar Kryeprokurorinë e Prokurorisë Speciale, unë jam pushim vjetor. Është duke u marrë Policia dhe Prokuroria me këtë rast. I kemi ndërmarrë të gjitha veprimet hetimore menjëherë”, ka thënë Kelmendi për gazetën Nacionale
