Erdogan fajëson sanksionet ndaj Moskës për krizën energjetike në Evropë
Presidenti turk Recep Tayyip Erdogan ka fajësuar sanksionet e vendosura ndaj Rusisë, për krizën energjetike të Evropës.
Sipas AFP-së, Erdogan është shprehur se kombet evropiane “po korrin atë që mbollën”, duke vendosur kufizime ekonomike ndaj Rusisë.
“Qëndrimi i Evropës ndaj Putinit, sanksionet, e çuan Putinin – me dëshirë ose jo – në pikën që të thoshte: “Nëse ju bëni këtë, unë do ta bëj atë”.
Ai po përdor të gjitha mjetet dhe armët e tij. Gazi natyror, për fat të keq, është një prej tyre,” ka thënë Erdogan.
Kujtojmë se të hënën edhe zëdhënësi i Kremlinit, Dmitry Peskov, fajësoi sanksionet për ndaljen e furnizimeve me gaz nga Rusia për në Evropë përmes Nord Stream.
