Dogana konfiskon mallra në vlerë mbi 100 mijë euro
Dogana e Kosovës, ka njoftuar se gjatë ditës së djeshme ka konfiskuara mallra me vlerë mbi 100 mijë euro.
Sipas një njoftimi në Facebook të Doganës, konfiskimi është bërë në dy raste të ndara.
“Rasti i parë ka ndodhur me një dërgesë në kontejner me mallra të deklaruara si produkte bujqësore, të cilat lirohen nga detyrimet tatimore, ndërsa që bazuar në bashkëpunimin e zyrtarëve doganor të Shqipërisë dhe Kosovës në Portin e Durrësit është hasur në gjenerator me fuqi prej 15 KË në sasi prej 50 copë dhe pompa ujië në sasi prej 100 copë. Malli është ndaluar dhe është iniciuar procesi për ndjekje penale të personave përgjegjës”, thuhet në njoftimin e Doganës.
Ata poashtu tregojnë se në rastin e dytë, Dogana ka ushtruar një kontrollë në një ndërtesë në zonën industriale të Prishtinës, me ç’rast ka gjetur sasinë prej 866 litra pije me përmbajtje alkoolike.
Siç thonë ata, malli është sekuestruar dhe është iniciuar ndjekja penale ndaj peronit/ave përgjegjës.
“Dogana e Kosovës ka rritur nivelin e kontrollave të bazuar në analiza dhe shkëmbim ndërkombëtarë të informacionit, si dhe bashkëpunimin me qyetarët dhe institucionet e Kosovës, e cila ka mundësuar që zbulimi i mallrave të kundërligjshme të dyfishohet në krahasim me vitin paraprak dhe të hyrat të rriten me përqindje mbi tre fish mbi normën e rritjes ekonomike. Dogana do të vazhdojë të zbatoj kontrolle të detajuara përfshirë kontrollet pas importit sipas autorizimeve ligjore, andaj apelojmë tek të gjithë tregtarët që të shmangin praktikat e kundërligjshme dhe të bashkëpunojnë me Doganën për të siguruar trajtim të barabartë ligjor, për ekonomi të shëndoshë të tregut”, thuhet tutje në njoftim.
