Deklarata e Samitit të Tiranës: Kosova dhe Serbia t’i zbatojnë të gjitha marrëveshjet
Liderët e Bashkimit Evropian dhe shteteve anëtare të tij, bashkë me ata të Ballkanit Perëndimor, kanë mbajtur për herë të parë samitin në Tiranë.
Bashkimi Evropian ka publikuar deklaratën e plotë nga ky samit, ku përfaqësuese nga Kosova ishte presidentja e Kosovës, Vjosa Osmani.
Në pjesën e Kosovës, më konkretisht në pikën e nëntë të deklarimit, flitet për dialogun mes Kosovës dhe Serbisë.
“Ne vazhdojmë të mbështesim plotësisht përpjekjet e Përfaqësuesit të Lartë të BE-së dhe Përfaqësuesit Special të BE-së për Dialogun Beograd-Prishtinë dhe çështje të tjera rajonale të Ballkanit Perëndimor dhe presim përparim konkret nga të dy palët drejt një marrëveshjeje gjithëpërfshirëse ligjërisht të detyrueshme për normalizimin e marrëdhënieve ndërmjet tyre.” – thuhet në këtë pikë.
Mes tjerash, në deklarimin e plotë ritheksohet se të dyja palët duhet t’i respektojnë plotësisht dhe t’i zbatojnë pa vonesa, marrëveshjet e kaluara.
“Kjo është thelbësore për stabilitetin dhe zhvillimin e të gjithë rajonit dhe për të siguruar që palët të mund të vazhdojnë në rrugët e tyre evropiane përkatëse. Ne ritheksojmë pritshmërinë tonë të fortë që të gjitha marrëveshjet e kaluara të respektohen plotësisht dhe të zbatohen pa vonesë. Ne u bëjmë thirrje të dyja palëve të angazhohen në mënyrë konstruktive për të zgjidhur të gjitha mosmarrëveshjet e tyre dypalëshe dhe të përmbahen nga veprimet e njëanshme dhe/ose provokuese që mund të çojnë në tensione dhe dhunë dhe retorikë që nuk janë të favorshme për dialogun. Ne i kujtojmë të dyja palëve përgjegjësinë e tyre të përbashkët për të garantuar paqen dhe stabilitetin.” – shkruan pjesa tjetër e pikës ku flitet për dialogun Kosovë-Serbi.
Mes tjerash, pjesë e deklarimit nga samiti, përmendet eskalimi i luftës dhe agresionit rus në Ukrainë.
Pika dy, rikonfirmon se Bashkimi Evropian është i përkushtuar për anëtarësimin e shteteve të Ballkanit Perëndimor, dhe bën thirrje për përshpejtim të këtij procesi.
“BE-ja mbetet partneri më i afërt i rajonit, investitori kryesor dhe partneri tregtar dhe donatori kryesor. Shkalla dhe diapazoni i jashtëzakonshëm i kësaj mbështetjeje duhet të bëhen më të dukshme dhe reflektuar në mënyrë proaktive nga Partnerët në debatin dhe komunikimin e tyre publik, në mënyrë që qytetarët mund të vlerësojnë përfitimet konkrete të partneritetit me BE-në.” – thuhet në pikën e pestë të kësaj deklarate.
Po ashtu, është konfirmuar se Bashkimi Evropian ka ndarë 1 miliard euro grante për Mbështetjen e Energisë në rajon.
“Paketa e re e BE-së për Mbështetjen e Energjisë, me vlerë 1 miliard euro grante që mund të sjellë 2.5 miliardë euro investime do të ndihmojnë Ballkanin Perëndimor të zbusë ndikimin ekrizën energjetike dhe përshpejtimin e tranzicionit energjetik në rajon.” – thuhet në pikën 12.
