Bideni do të takohet me Mohammed bin Salman-in pavarësisht nga kritikat
Presidenti i Shteteve të Bashkuara, Joe Biden, të premten do të udhëtojë drejt Arabisë Saudite për t’u takuar me princin e këtij shteti, Mohammed bin Salman, i cili de-fakto e udhëheq vendin.
Raportet mes Shteteve të Bashkuara dhe Arabisë Saudite ishin tensionuar për shkak të vrasjes së gazetarit saudit me banim në ShBA, Jamal Khashoggi, nga agjentët sauditë në konsullatën e Arabisë Saudite në Stamboll.
Princi e ka mohuar përfshirjen e tij në vrasje, por inteligjenca amerikane ka arritur në konkluzionin se ai e ka miratuar vrasjen.
Në mesin e temave të diskutimit në takimin mes dy udhëheqësve do të jenë furnizimi me energji, të drejtat e njeriut dhe bashkëpunimi në fushën e sigurisë.
Arabia Saudite është prodhuesja më e madhe e naftës në botë dhe përpjekja për përmirësimin e marrëdhënieve vjen pas rritjes së çmimit të derivateve, e nxitur nga lufta në Ukrainë.
Pritet që Shtetet e Bashkuara t’u bëjnë thirrje zyrtarëve sauditë që ta shtojnë prodhimin.
Të enjten vonë, Arabia Saudite njoftoi se do ta hapë hapësirën e vet ajrore për fluturimet komerciale izraelite. Vendimi u mirëprit nga Shtetet e Bashkuara.
