Avdullah Hoti “mik i madh i rezistencës iraniane”: Regjimi aktual shtypës i Iranit nuk do të zgjasë
Deputeti i Lidhjes Demokratike të Kosovës, Avdullah Hoti në Samitin Botëror “Irani i Lirë, 2024” që u mbajt në Paris ka mbajtur një fjalim mbështetës për rezistencën popullore iraniane, me ç’rast është shprehur se “regjimi aktual shtypës nuk mund të zgjasë” dhe se në fakt, vetë “Historia na ka mësuar se të gjitha regjimet shtypëse përfundimisht dështojnë”.
Hoti – i cili u ftua të mbajë fjalim nga moderatorja me cilësimin si “mik i madh i rezistencës iraniane” – tha se “rezistenca e popullit të Iranit sot është më e fortë”.
“Por a po bëjmë ne, bota demokratike, mjaftueshëm për të mbështetur rezistencën e popullit iranian për liri? Besoj se kjo është e hapur për debat. Është e vërtetë që sanksionet ndaj regjimit iranian duhet të synohen më mirë për t'u siguruar që regjimi të goditet drejtpërdrejt. Dhe ato duhet të jenë të pakufizuara dhe të koordinuara në të gjithë botën demokratike. Gjithashtu, duhet të jemi të qartë dhe të japim sinjale të qarta për të gjithë ata individë që janë përgjegjës për shkeljet e të drejtave të njeriut, torturat dhe ekzekutimet, se do të ndëshkohen”, tha ai.
“Zonja dhe zotërinj, rezistenca e popullit të Iranit sot është më e fortë. Dhe mbështetja e botës demokratike është më e fortë. Ne kemi parë zhvillime të reja muajin e kaluar. Unë besoj fuqimisht se Perëndia punon në mënyra misterioze. Dhe këtë e kemi parë gjatë historisë. Zoti i mbështet ata që ndjekin drejtësinë. Dhe besoj se tani është koha që ekipi i zonjës Rajavi të fillojë të përgatisë se si do të organizohet shoqëria e lirë iraniane. Si do të çimentohen të drejtat e njeriut dhe demokracia dhe se si besimi, kultura dhe diversiteti i popullit iranian do të bashkëjetojnë në një Iran të lirë dhe demokratik. Unë besoj se kjo do të mobilizojë njerëzit brenda dhe jashtë Iranit”, shtoi Avdulah Hoti.
