Ana Bërnabiq mandatohet për kryeministre të Qeverisë së re serbe

Presidenti i Serbisë, Aleksandar Vuçiq, ka propozuar Ana Bërnabiqin në postin e kryeministres së Qeverisë së re të Serbisë.

Në një konferencë për media në Beograd, presidenti serb Aleksander Vuçiq, ka thënë se vendimi për mandatarin e ri të Qeverisë ishte një vendim i ndërlikuar.

Ai tha se Bërnabiq nuk do të jetë në krye të ekzekutivit për një mandat të plotë dhe paralajmëroi se më 2024 do të ketë ndryshime në Qeverinë serbe.

“Ana tani ka detyra të rëndësishme”, tha Vuçiq.

Bërnabiq ka qenë në krye të Qeverisë serbe në mandatin e kaluar dhe ishte mandatar nga partia në pushtet, Partia Përparimtare Serbe.

Qeveria serbe zgjidhet në Kuvend pas propozimit të kandidatit për kryeministër. Kuvendi më pas voton për zgjedhjen e kabinetit qeverisës.

Partia Përparimtare Serbe (SNS) së bashku me partneren e saj tradicionale, Partinë Socialiste të Serbisë, kanë shumicën në Kuvend.

Vuçiq tha se ai pret që Qeveria të formohet në 20 ditët e ardhshme./rel/