Agani: Arben Vitia zgjodhi improvizimet ligjore në vend të reformës në shëndetësi
Ish-ministri i Shëndetësisë, Ferid Agani, ka vlerësuar se qasja e ministrit aktual në detyrë, Arben Vitia, nuk ka sjellë rezultatet e pritura.
Ai konsideron se fokusi ka qenë më shumë në improvizime ligjore sesa në zbatimin e ligjeve ekzistuese, të cilat ishin pjesë e një reforme të menduar mirë për sistemin shëndetësor.
“Sa i përket punës së ministrit aktual, duhet thënë se qasja e tij nuk ka sjellë rezultatet e pritura kur të kemi parasysh mbështetjen e madhe parlamentare nga partia që ishte në pushtet, sepse është fokusuar më shumë në improvizime ligjore sesa në zbatimin e ligjeve ekzistuese që ishin pjesë e reformës mirë të menduar sistemore të shëndetësisë ”, tha ish- ministri Agani për Front Online.
Si shembull të mungesës së vizionit, ai përmend edhe mos themelimin e Odës së Psikologëve Klinikë, duke lënë të parregulluar një sektor të rëndësishëm të shëndetit mendor.
“Legjislacioni në fuqi ka qenë dhe është plotësisht i mjaftueshëm për të filluar reformat e nevojshme, por ka munguar vendosmëria për ta zbatuar. Kjo ka bërë që, në vend të progresit të qëndrueshëm, të kemi improvizime që krijojnë edhe më shumë paqartësi ”, deklaroi Agani.
