Zhvillimet kryesore nga dita 409 e luftës Rusi-Ukrainë
Departamenti i Drejtësisë i ShBA-së ka nisur hetimet për rrjedhje të mundshme të dokumenteve të klasifikuara ushtarake që janë postuar në disa faqe të mediave sociale, duke përfshirë Twitter-in dhe duket se detajojnë ndihmën e ShBA-së dhe NATO-s për Ukrainën.
Lidhur me këto dokumente Associated Press raportoi se ishin të etiketuara se sekrete dhe u ngjanin përditësimeve rutinë që ushtria amerikane do të prodhonte çdo ditë. Ndërkohë, Reuters raportoi se tre zyrtarë amerikanë të paidentifikuar thanë se Rusia ose elementë pro-rusë mund të ishin pas rrjedhjes dhe se dokumentet ofronin një pamje mujore të luftës dhe dukej se ishin “rregulluar” për të minimizuar humbjet ruse.
Ministria e Mbrojtjes e Ukrainës ka bërë të ditur se tre civilë janë vrarë dhe 17 janë plagosur gjatë 24 orëve të fundit në sulmet e artilerisë, raketave dhe ajrore ruse në 114 vendbanime në nëntë rajone. Autoritetet në zonat e kontrolluara nga Rusia në Ukrainën lindore thanë se shtatë civilë janë vrarë të enjten në dy sulme të artilerisë ukrainase, ndërsa të dyja palët kanë mohuar shënjestrimin e civilëve.
Agjencitë ruse të lajmeve njoftuan se hetuesit e Shërbimit Federal të Sigurisë Ruse kanë akuzuar zyrtarisht Evan Gershkovich për spiunazh, por gazetari i Wall Street Journal i ka mohuar akuzat dhe ka thënë se ai ishte duke punuar si gazetar. Gershkovich është gazetari i parë amerikan i arrestuar në Rusi me akuza për spiunazh që nga fundi i Luftës së Ftohtë.
Ministri i Jashtëm i Rusisë, Sergei Lavrov, ka kërcënuar se do të braktisë një marrëveshje historike me Ukrainën nëse mbesin pengesat për eksportet e Moskës. Marrëveshja e korrikut të kaluar i lejon Ukrainës të eksportojë grurë përmes një korridori të sigurt në Detin e Zi. “Nëse nuk ka përparim të mëtejshëm në heqjen e barrierave për eksportin e plehrave dhe drithërave ruse, ne do të mendojmë nëse kjo marrëveshje është e nevojshme”, - është shprehur Lavrov në një konferencë shtypi në Ankara së bashku me homologun e tij turk, Mevlut Cavusoglu.
Ministri i energjisë, Herman Halushchenko njoftoi se Ukraina mund të rifillojë eksportin e energjisë elektrike pas një periudhe gjashtëmujore, duke pasur parasysh suksesin e riparimeve të kryera pas sulmeve të përsëritura ruse. Tetorin e kaluar, Ukraina ndaloi eksportet e energjisë elektrike në Bashkimin Evropian – tregu kryesor i saj i eksportit të energjisë që nga fillimi i luftës – pas sulmeve të Rusisë në infrastrukturën energjetike.
Ukraina ka thënë se Rusia po i përqendron të gjitha përpjekjet e saj në kapjen e qytetit lindor të Bakhmut, ku e përshkroi situatën si "të vështirë", por tha se po rezistonte. Ministria e Mbrojtjes e Mbretërisë së Bashkuar tha më herët se forcat ruse kishin "me shumë gjasa" për të përparuar në qendrën e qytetit të Bakhmut dhe kapën bregun perëndimor të lumit Bakhmutka, duke kërcënuar rëndë rrugën kryesore të furnizimit të Ukrainës në perëndim.
Presidenti i Ukrainës Volodymyr Zelenskiy kritikoi të premten trajtimin e Rusisë ndaj komunitetit tatar të pakicës myslimane në Krimenë e kontrolluar nga Kremlini dhe u zotua të rimarrë gadishullin nga Rusia gjatë një iftari të parë zyrtar shtetëror. Duke folur jashtë qendrës së kryeqytetit, Zelenskiy njoftoi se Ukraina po fillonte një traditë të re të pritjes së një iftari zyrtar.
