Zhvillimet e fundit nga dita 418 e luftës Rusi-Ukrainë
Aktivisti rus i opozitës Vladimir Kara-Murza është dënuar me 25 vjet burg për kundërshtimin e tij ndaj luftës së Rusisë në Ukrainë.
Një numër vendesh, duke përfshirë Britaninë e Madhe dhe Francën, kanë ngritur shqetësime për burgosjen e tij. Sekretari i Jashtëm i Mbretërisë së Bashkuar, James Cleverly, ka thirrur për një shpjegim ambasadorin rus në Britaninë e Madhe, Andrei Kelin, pasi Kara-Murza ka shtetësi të dyfishtë ruso-britanike.
Ndërkohë, ambasadorja britanike në Rusi, Deborah Bronnert, ka thënë se vendimi i një dënimi 25-vjeçar ishte "tronditës" dhe bëri thirrje për lirimin e tij të menjëhershëm. Megjithatë, gruaja e aktivistit, Evgenia Kara-Murza, ka thënë për transmetuesin britanik LBC se ishte "e habitur" nga përgjigja "e dobët" e qeverisë së Mbretërisë së Bashkuar.
The Guardian raporton se edhe kreu i OKB-së për të drejtat e njeriut i ka kërkuar Rusisë ta lirojë aktivstin. Volker Türk ka thënë se: “Askush nuk duhet të privohet nga liria për ushtrimin e të drejtave të tij njerëzore”.
Zhvillime të tjera:
Kremlini ka thënë se perspektivat për një rinovim të nismës së grurit të Detit të Zi, në të cilën Rusia lejon Ukrainën të dërgojë eksporte bujqësore nga portet e saj të Detit të Zi nëpërmjet Turqisë, nuk ishin "aq të shkëlqyera". Rusia është ankuar vazhdimisht se sanksionet ekonomike perëndimore po e pengojnë atë të eksportojë produkte bujqësore dhe se këto duhet të hiqen në mënyrë që ajo të pajtohet me çdo zgjatje.
Një zëdhënës i qeverisë ka njoftuar se Sllovakia do të ndalojë përkohësisht importet e drithërave dhe produkteve të tjera të përzgjedhura nga Ukraina për të mbrojtur fermerët e saj, duke iu bashkuar Polonisë dhe Hungarisë në të njejtën masë.
Ministria e restaurimit të Ukrainës ka thënë se nisma e grurit të Detit të Zi rrezikon të mbyllet pasi Rusia bllokoi përsëri inspektimet e anijeve të rënda dakord sipas marrëveshjes në ujërat turke.
Ambasadori amerikan në Rusi ka vizituar për herë të parë gazetarin e burgosur Evan Gershkovich. Duke postuar në Twitter, llogaria zyrtare e ambasadës tha se ambasadorja Lynne Tracey e vizitoi atë në burgun Lefortovo.
Shtetet e Bashkuara dhe dhjetëra anëtarë të tjerë të OKB-së kanë kërkuar që Rusia të lirojë Gershkovich. “Ne protestojmë ndaj përpjekjeve ruse për të kufizuar dhe frikësuar median,” – ka thënë Linda Thomas-Greenfield, ambasadorja e ShBA-së në Kombet e Bashkuara, duke lexuar një deklaratë të mbështetur nga 45 vende të tjera anëtare të OKB-së, përfshirë Britaninë e Madhe, Francën, Gjermaninë dhe Japoninë.
Ministria sllovake e Mbrojtjes ka njoftuar se vendi i ka dorëzuar Ukrainës të 13 avionët luftarakë MiG-29 që kishte premtuar.
Sipas një raporti të prokurorit të përgjithshëm ukrainas, që nga pushtimi rus, pothuajse 500 fëmijë janë vrarë në Ukrainë. Raporti numëron 470 fëmijë të vrarë dhe 948 të plagosur – megjithëse departamenti beson se numri i fëmijëve të lënduar është më i lartë.
