Zelensky fton Macronin t’i shohë personalisht krimet ruse në Ukrainë

Presidenti ukrainas Volodymyr Zelensky ka thënë në një intervistë për CNN se ai e ka ftuar presidentin francez Emmanuel Macron të vizitojë Ukrainën për të parë vetë se forcat ruse kishin kryer "gjenocid" ndaj popullatës civile. Macron ka hezituar të përdorë fjalën gjenocid, duke deklaruar më parë se "nuk jam i sigurt se përshkallëzimi i retorikës i shërben kauzës".

“E ftova të vijë kur të ketë mundësi. Do të vijë të shohë dhe jam i sigurt se do ta kuptojë”, ka thënë Zelensky.

Zelensky ka thënë më parë se ngurrimi i Macronit për të përdorur termin ishte "shumë i dhimbshëm për ne".

Shtetet e Bashkuara, të cilat historikisht kanë hezituar të akuzojnë shtetet për gjenocid, javën e kaluar akuzuan presidentin rus Vladimir Putin për kryerjen e akteve të gjenocidit duke u përpjekur të "fshijë idenë" e një identiteti ukrainas.

Konventa e OKB-së për gjenocidin, nënshkruese e së cilës është SHBA, kërkon që vendet të ndërhyjnë pasi gjenocidi të identifikohet zyrtarisht.