Ukrainasit sulmuan një qytet kyç të pushtuar - "Nëse bie, e gjithë linja për në Kherson shembet"
Ukraina sulmoi Melitopolin e pushtuar, një qytet me vendndodhje strategjike në juglindje të vendit, raportuan burime ukrainase dhe ruse. Rusët thanë se sulmi me raketa vrau dy persona. Autoritetet pro-Moskës në zonë thonë se sulmi me raketa vrau dy persona dhe plagosi 10, ndërsa kryetari i bashkisë Ivan Fedorov thotë se dhjetëra "pushtues" u vranë.
Fedorov pretendon se sulmi goditi një kishë që rusët e kishin kthyer në një pikë grumbullimi. Këshilltari i presidentit ukrainas Zelensky thotë se qyteti i Melitopol është vendimtar për mbrojtjen e jugut.
"Nëse [qyteti] bie, e gjithë linja deri në Kherson do të shembet," pohoi ai në një intervistë video në mediat sociale. Reuters nuk mundi të verifikonte në mënyrë të pavarur raportet për sulme ose vdekje.
Shpërthime në Krime dhe në selinë e Flotës Ruse të Detit të Zi
Pati gjithashtu raportime për shpërthime të shumta që goditën Krimenë, të cilën Rusia e ka aneksuar. Dyshohet se janë goditur edhe kazermat. Zyrtarët ukrainas nuk kanë komentuar mbi shpërthimet në Krime. Pati gjithashtu raportime për shpërthime në Sevastopol, selia e Flotës ruse të Detit të Zi, në kazermat ushtarake ruse në Sovetskoye dhe në zonat e Hvardiiska, Dzhankoi dhe Nizhnohirsky.
Portali jozyrtar mediatik i Krimesë, Krimski Veter, njoftoi se ka të vdekur dhe të plagosur nga shpërthimi në kazermën ushtarake ruse në Sovetsko. Megjithatë, kanali pro-rus i Krimesë pretendon se zjarri i kazermës është shkaktuar nga "përdorimi i pakujdesshëm i zjarrit". "Dy persona vdiqën. Tani të gjithë ushtarët, rreth dyqind veta, janë vendosur në dhoma të tjera", thuhet në njoftim.
Sergei Aksenov, kreu i Krimesë i emëruar nga Rusia, njoftoi në Telegram: Sistemi i mbrojtjes ajrore po punonte mbi Simferopol. Të gjitha shërbimet po funksionojnë si zakonisht. Mihail Razvozhaev, guvernatori i Sevastopolit, tha se shpërthimet u shkaktuan nga "stërvitjet e të shtënave".
Shpërthimet erdhën pasi Moska i shtoi sulmet me raketa në Ukrainë javën e kaluar, pas pretendimeve ruse se Kievi qëndron pas sulmeve të fundit me dron në aeroportet ushtarake thellë brenda territorit të saj.
1.5 milionë njerëz në rajonin e Odesa mbetën pa energji elektrike pas sulmit
Më shumë se 1.5 milionë njerëz në qytetin jugor të Ukrainës, Odesa, mbetën pa energji elektrike pas sulmeve me dronë rusë në infrastrukturën e prodhimit të energjisë elektrike, tha presidenti Volodymyr Zelensky në një fjalim video. E gjithë infrastruktura jo kritike në portin ukrainas të Odessa ishte pa energji pasi Rusia goditi dy objekte energjetike me drone iraniane, thanë zyrtarët të shtunën, duke shtuar se riparimi i dëmit mund të zgjasë me muaj.
Në një video fjalim, Zelenski tha se ka një deficit të madh në prodhimin e energjisë elektrike.
Që nga tetori, Moska ka shënjestruar në valë të mëdha infrastrukturën energjetike të Ukrainës me raketa dhe dronë, dhe Kievi pranoi të premten se çdo termocentral dhe hidrocentral në vend është dëmtuar. Administrata rajonale tha se njerëzit që mbështeten vetëm në energjinë elektrike në shtëpitë e tyre duhet të largohen. Zyrtarët thanë se sulmet ruse goditën linjat kryesore të energjisë dhe pajisjet në orët e para të së shtunës.
"Sipas parashikimeve paraprake, do të duhet shumë më tepër kohë për të rivendosur objektet energjetike në rajonin e Odesës sesa pas sulmeve të mëparshme," tha administrata. “Nuk po flasim për ditë, por për javë, dhe ndoshta dy deri në tre muaj”, thuhet në postimin në Facebook.
Kievi thotë se Rusia ka lëshuar qindra drone Shahed-136 të prodhuar nga Irani në objektiva në Ukrainë dhe i përshkruan sulmet si krime lufte për shkak të efektit të tyre shkatërrues në jetën e civilëve. Moska pretendon se qëllimet janë të justifikuara ushtarakisht. Zyra e Prokurorit të Përgjithshëm të Ukrainës tha se dy termocentrale në rajonin e Odesa u goditën nga dronët Shahed-136.
Odessa, qyteti port më i madh i Ukrainës, kishte një popullsi prej më shumë se 1 milion para pushtimit rus të 24 shkurtit. /Nacionale/
