Ukraina shkatërron shtabin e mercenarëve rusë Wagner në lindje të vendit
Raportimet e fundit tregojnë se artileria ukrainase ka goditur një seli të grupit paraushtarak rus Wagner në hije të mercenarëve në Ukrainën lindore.
Sulmi në Popasna u raportua nga Serhiy Hayday, guvernatori ukrainas i rajonit të Luhansk, dhe disa reporterë të luftës pro-Kremlinit.
Sipas BBC-së, numri i viktimave nuk është bërë ende i ditur dhe detajet nga sulmit mbeten të paqarta.
Kutojmë se grupi Wagner ka qenë i lidhur me krime lufte. Ai u dislokua në Krime dhe në rajonin e Donbasit të Ukrainës në vitin 2014, kur forcat e mbështetura nga Kremlini dëbuan trupat ukrainase nga zonat që më vonë deklaruan se ishin pjesë e Rusisë.
Njësitë Wagner janë dërguar gjithashtu në Siri, Libi, Mali dhe Republikën e Afrikës Qendrore.
Edhe pse Kremlini nuk e pranon ekzistencën e Wagner-it, inteligjenca perëndimore e lidh grupin me Yevgeny Prigozhin - i quajtur si "kuzhinieri i Putinit", sepse biznesi i tij i kateringut ka ndihmuar prej kohësh presidentin Vladimir Putin dhe forcat e armatosura.
Prigozhin, ashtu edhe si shumë zyrtarë të tjerë rusë, është nën sanksionet perëndimore.
Wagner njihet si PMC - kompani private ushtarake. Por ekspertët perëndimorë thonë se ata janë mercenarë të sponsorizuar nga shteti që veprojnë në interes të Kremlinit. Ata janë akuzuar vazhdimisht për krime të përsëritura të luftës dhe shkelje të të drejtave të njeriut.
Në Telegram, Guvernatori Hayday shkroi se forcat ukrainase "goditën shtabin e armikut, vendndodhja e të cilit u zbulua falë një gazetari rus".
"Këtë herë sulmi i suksesshëm shkatërroi selinë e Wagner PMC në Popasna," tha ai.
Ndërsa, e përditshmja ukrainase Ukrainska Pravda raportoi se një gazetar rus pro-Kremlinit, Sergei Sreda, zbuloi selinë e Wagner në një postim në Telegram më 8 gusht. Pasi kishte postuar një foto të vizitës së tij në shtab dhe një tabelë në njërën prej fotove identifikonte adresën si Mironovskaya 12, Popasna.
Edhe pse ky postim më vonë ishte fshirë, kopjet e tij kishin vazhduar të qarkullojnë në internet.
Popasna shtrihet në jug të Severodonetsk në rajonin Luhansk, i cili pas luftimeve të ashpra ra nën kontroll të plotë të forcave ruse .
Kujtojmë se, forcat ukrainase tani kanë disa nga Himars-ët e ShBA-së (Sistemi i Raketave të Artilerisë me Lëvizshmëri të Lartë), të cilat lëshojnë raketa të afta për të goditur objektivat ruse shumë prapa vijës së frontit.
Deputeti ukrainas Oleksiy Honcharenko shkroi në Facebook: "Nuk ka më shtab të Wagner në Popasna. Faleminderit, HIMARS dhe Forcat e Armatosura të Ukrainës!"
Ndërkohë, edhe disa raporte ukrainase implikojnë Wagnerin në zjarrin e burgut Olenivka më 29 korrik, i cili vrau dhjetëra të burgosur të luftës ukrainas
