Trump thotë se është arritur marrëveshje me Iranin
Presidenti amerikan Donald Trump njoftoi të dielën se është arritur marrëveshje me Iranin dhe se Shtetet e Bashkuara do t’i japin fund bllokadës detare ndaj këtij vendi, në atë që konsiderohet zhvillimi më i rëndësishëm deri tani pas muajsh negociatash diplomatike.
Në një postim në Truth Social, Trump deklaroi se marrëveshja me Republikën Islamike të Iranit tashmë është kompletuar.
“Marrëveshja me Republikën Islamike të Iranit tashmë është kompletuar. Urime të gjithëve!”, shkroi presidenti amerikan.
Sipas Trumpit, pjesë e këtij zhvillimi është edhe hapja e menjëhershme e Ngushticës së Hormuzit, një prej korridoreve më të rëndësishme detare për transportin global të naftës. Ai tha se ka autorizuar hapjen pa pagesë të kësaj rruge detare, si dhe heqjen e menjëhershme të bllokadës detare të Shteteve të Bashkuara.
“Me këtë rast, autorizoj plotësisht hapjen pa pagesë të Ngushticës së Hormuzit dhe, njëkohësisht, autorizoj heqjen e menjëhershme të bllokadës detare të Shteteve të Bashkuara”, shkroi Trump.
Presidenti amerikan e shoqëroi njoftimin edhe me një mesazh drejtuar industrisë globale të transportit detar dhe energjisë: “Anijet e botës, ndizni motorët. Le të rrjedhë nafta!”
Megjithatë, detajet e marrëveshjes nuk u publikuan menjëherë. Nuk është bërë e ditur se çfarë kushtesh përfshin marrëveshja, cilat garanci janë dhënë nga palët apo si do të zbatohet në praktikë heqja e bllokadës detare.
Njoftimi i Trump erdhi pasi ai kishte shprehur disa herë gjatë ditës besimin se marrëveshja do të finalizohej të dielën. Zhvillimi pritet të ndiqet me vëmendje nga qeveritë ndërkombëtare dhe tregjet globale të energjisë, për shkak të rolit strategjik të Ngushticës së Hormuzit në furnizimin botëror me naftë.
