Trump diagnostikohet me pamjaftueshmëri kronike venoze pas ënjtjes në këmbë. Pyet ChatGPT-në
Presidenti i Shteteve të Bashkuara të Amerikës, Donald Trump, është ekzaminuar për ënjtje në këmbë dhe është diagnostikuar me pamjaftueshmëri kronike venoze, njoftoi të enjten Shtëpia e Bardhë, raportoi CNN.
Trump, 79 vjeç, iu nënshtrua një “ekzaminimi të gjithanshëm, përfshirë studime diagnostike vaskulare” me Njësinë Mjekësore të Shtëpisë së Bardhë, tha zëdhënësja për shtyp Karoline Leavitt, duke lexuar një shënim nga mjeku i presidentit, Kapiten Sean Barbabella.
Në shënimin e Barbabellas thuhej se “u kryen ultratinguj doppler bilateral të gjymtyrëve të poshtme dhe zbuluan pamjaftueshmëri kronike venoze, ICD-9, një gjendje e zakonshme, veçanërisht tek individët mbi moshën 70-vjeçare.”
Ekzaminimi u krye pasi Trump kishte “vërejtur ënjtje të lehtë në këmbët e tij të poshtme” gjatë javëve të fundit, tha Leavitt.
Duke lexuar shënimin e Barbabellas, Leavitt tha se nuk kishte “asnjë provë për trombozë të venave të thella apo sëmundje arteriale” dhe se analizat laboratorike të Trump ishin “brenda kufijve normalë.” Ai gjithashtu iu nënshtrua një ekokardiograme, e cila nuk tregoi “shenja të dështimit të zemrës, dëmtimit të veshkave apo sëmundjes sistemike,” shtoi ajo.
Pamjaftueshmëria kronike venoze është një gjendje ku valvulat brenda disa venave nuk funksionojnë siç duhet, gjë që mund të lejojë që gjaku të grumbullohet në vena. Rreth 150,000 persona diagnostikohen çdo vit me këtë gjendje, dhe rreziku rritet me moshën. Simptomat mund të përfshijnë ënjtje në pjesën e poshtme të këmbëve ose kyçe, dhembje apo ngërçe në këmbë, vena varikoze, dhimbje ose ndryshime në lëkurë. Trajtimi mund të përfshijë medikamente ose, në faza të mëvonshme, procedura mjekësore.
Zëdhënësja për shtyp gjithashtu komentoi për mavijosjet që janë shfaqur në pjesën e pasme të dorës së presidentit, të cilat ajo i atribuoi “shtrëngimeve të shpeshta të duarve” si dhe përdorimit të aspirinës.
