Teherani përfshihet nga flakët: Intensifikohen bombardimet ShBA-Izrael në Iran
Depot e karburantit afër kryeqytetit iranian, Teheran, u përfshinë nga flakë masive të dielën, me forcat amerikane dhe izraelite që intensifikuan bombardimet. Në anën tjetër, lideri de fakto i Iranit u zotua t'i bëjë kundërshtarët e tij të "paguajnë çmimin."
Sipas The New York Times, sulmet dukeshin të ishin të parat që shënjestruan infrastrukturën energjetike që kur lufta e përbashkët ajrore ShBA-Izrael kundër Iranit filloi fundjavën e kaluar.
Ushtria e Izraelit citohet të ketëd deklaruar se kishte vënë në shënjestër depot e karburantit sepse ato po përdoreshin nga ushtria e Iranit. Në një fjalim televiziv të shtunën mbrëma, Benjamin Netanyahu, kryeministri izraelit, tha se Izraeli kishte "shumë më tepër objektiva" që donte të godiste në Iran, pjesë e një përpjekjeje për të destabilizuar sundimin e Republikës Islamike të Iranit.
Mediat ndërkombëtare raportuan se forcat amerikane gjithashtu intensifikuan sulmet në Iran kundër një sërë objektivash ushtarake, duke përfshirë Korpusin e Gardës Revolucionare të Iranit, mbrojtjen ajrore dhe raketat.
Një udhëheqës i lartë iranian, Ali Larijani, refuzoi kërkesën e Presidentit Trump për dorëzimin e pakushtëzuar të Iranit. Ai u zotua të shtunën se Irani ishte i vendosur të hakmerrej për vdekjen e Ayatollah Ali Khamenei, i cili u vra në goditjen fillestare të luftës ajrore të ShBA-së dhe Izraelit me Iranin. Qindra njerëz janë vrarë që kur filloi konflikti, kryesisht në Iran.
Sulmet iraniane shënjestruan infrastrukturën civile kundër aleatëve të ShBA-së në të gjithë Gjirin Persik. Një sulm me dron iranian dëmtoi një impiant për shkripëzimin e ujit në Bahrein, tha ministria e brendshme e vendit. Vendet e Gjirit varen pothuajse tërësisht nga shkripëzimi për ujë të pijshëm.
Ministria e Mbrojtjes e Kuvajtit raportoi "një valë dronësh" që dëmtuan rezervuarët e ruajtjes së karburantit në aeroportin ndërkombëtar të Kuvajtit dhe Institucioni i saj Publik për Sigurimet Shoqërore tha se ndërtesa e tij kryesore ishte dëmtuar nga një sulm. Qeveria e Kuvajtit gjithashtu raportoi të dielën se dy roje kufitare ishin vrarë në sulme, duke e çuar numrin e të vdekurve në Gji në të paktën 14.
Siç shkruan NYT, planet e Presidentit Trump për hapat e ardhshëm në konflikt mbetën të paqarta ndërsa administrata ndryshoi pozicionin e saj. Të shtunën, zoti Trump u tha gazetarëve në Air Force One se ai kishte përjashtuar përfshirjen e forcave kurde në luftë pasi kjo do ta bënte konfliktin "më kompleks". Dy ditë më parë, ai tha se ishte "plotësisht pro" një ofensive kurde në Iran.
Trump gjithashtu fajësoi Iranin për një sulm ajror që goditi një shkollë fillore në Iran më 28 shkurt, duke vrarë dhjetëra fëmijë.
Kur u pyet nëse ai do të konsideronte dërgimin e trupave tokësore në Iran për të siguruar objektet e tij bërthamore, zoti Trump tha se "në një moment ndoshta do ta bëjmë." Ai shtoi: "Do të ishte një gjë e mrekullueshme, por tani për tani ne thjesht po i shkatërrojmë ata."
