Stuhia e pluhurit në Irak: Pesë mijë persona të hospitalizuar
Pas stuhisë së fortë të pluhurit, e shtata me radhë brenda një muaji në Irak, një person ka vdekur dhe më shumë se 5,000 njerëz janë pranuar në spitale me probleme të frymëmarrjes.
BBC shkruan se, një zëdhënës i ministrisë së Shëndetësisë ka thënë se 2,000 nga rastet ishin raportuar në provincën e Bagdadit.
Ndërkohë që janë këshilluar personat me astmë dhe sëmundje të tjera kronike të qëndrojnë brenda.
Stuhitë e pluhurit janë të zakonshme në Irak, por disa ekspertë besojnë se ato po bëhen më të shpeshta për shkak të ndryshimeve klimatike.
Zëdhënësi i Ministrisë së Shëndetësisë, Saif al-Badr, tha të enjten se të gjitha objektet mjekësore të Irakut ishin në gatishmëri dhe se numri i njerëzve të pranuar me probleme të frymëmarrjes "nuk ishte përfundimtar".
Shumica e të prekurve kishin sëmundje kronike si astma ose ishin të moshuar, dhe shumica dolën nga spitali pasi morën oksigjen dhe trajtime të tjera shtesë.
Stuhitë e pluhurit e godasin kryesisht Irakun në muajt e verës, dhe shpesh shoqërohen me erëra të forta të njohura si shamal që fryjnë nga veriperëndimi.
Muajin e kaluar, një zyrtar i ministrisë së Mjedisit paralajmëroi se Iraku mund të përballet me "272 ditë pluhuri" në vit në dekadat e ardhshme.
Për shkak të thatësirës, shkretëtirëzimit dhe rënies së reshjeve, stuhitë pritet të bëhen më të shpeshta
Vitet e fundit, Iraku ka parë reshje rekord të ulëta dhe temperatura verore që kalonin 50 gradë Celsius.
Rezervat ujore të Irakut janë tashmë 50% më të ulëta se vitin e kaluar dhe ministria e burimeve ujore ka paralajmëruar se lumenjtë jetikë Tigër dhe Eufrat, të cilët sigurojnë pjesën më të madhe të ujit sipërfaqësor të vendit, mund të thahen brenda 20 viteve.
Bota tashmë është ngrohur me rreth 1.2 gradë C që nga fillimi i epokës industriale dhe nëse qeveritë në mbarë botën nuk bëjnë ulje të mëdha të emetimeve, temperaturat do të vazhdojnë të rriten.
