Singapori pritet të ekzekutojë një grua për herë të parë në gati 20 vjet
Autoritetet në Singapor pritet që të ekzekutojnë një grua për herë të parë në gati dy dekada, thonë mbrojtësit e të drejtave të njeriut.
Shtetasja e Singaporit, Saridewi Djamani, 45 vjeçe, ishte shpallur fajtore më 2018 për trafikimin e 30 gramëve heroinë, raporton televizioni BBC.
Ajo do të jetë e dënuara e dytë për shkelje rreth drogës që do të ekzekutohet brenda tri ditëve, pas shtetasit tjetër, Mohd Aziz bin Hussain, ndërsa e pesëmbëdhjeta nga marsi i vitit të kaluar.
Singapori është në mesin e shteteve me ligjet më të ashpra kundër drogës në botë. Autoritetet thonë se këto ligje janë të nevojshme për ta mbrojtur shoqërinë.
Azizi ishte dënuar për trafikimin e 50 gramëve heroinë. Në Singapor, dënimi me vdekje shqiptohet për trafikimin e më shumë se 15 gramëve heroinë dhe më shumë se 500 gramëve kanabis.
Në prill të këtij viti, një shtetas tjetër i Singaporit, Tangaraju Suppiah, u ekzekutua për trafikimin e një kilogrami kanabis, të cilin kurrë nuk e kishte prekur. Autoritetet thanë se ai e kishte bashkërenduar shitjen e drogës përmes telefonit.
Miliarderi britanik, Sir Richard Branson, përsëri e ka kritikuar Singaporin për ekzekutimin e të dënuarve, duke thënë se dënimi me vdekje nuk e parandalon krimin.
“Trafikuesit e sasisë së vogël të drogës kanë nevojë për ndihmë, sepse shumica ngacmohen për shkak të rrethanave të tyre”- shkroi ai në një rrjet social, duke shtuar se nuk është shumë vonë për ta parandaluar ekzekutimin e gruas së dënuar.
Mediat lokale kanë raportuar se Djamani kishte rrëfyer gjatë gjykimit se ishte duke grumbulluar heroinë për përdorim personal gjatë muajit të Ramazanit.
