Shfaqen pamjet e arrestimeve të protestuesve në Rusi

Në Rusi, sot në mëngjes nisën protestat e para kundër mobilizimit të urdhëruar nga Presidenti Vladimir Putin.

Videot e qytetarëve që protestojnë në lindje të vendit - në Novosibirsk, Irkutsk, Tomsk dhe qytete të tjera - po përhapen në rrjetet sociale.

Kudo që shfaqen protestuesit, përveç policisë së rregullt, shfaqen edhe forca të trazirave, me helmeta në kokë, të cilët arrestojnë njerëzit duke i tërhequr zvarrë ose më mirë duke i nxjerrë nga rruga.

Arrestimet e para

Janë shfaqur videot që tregojnë arrestimet e para dhe tashmë janë përmendur dhjetëra të arrestuar. Të paktën 12 persona u arrestuan në Irkutsk.

Në video shihet se policia hedh përtokë disa persona gjatë arrestimeve.

Këto shifra mund të rriten ndjeshëm sonte pasi lëvizja kundër luftës Vesna ka bërë thirrje për protesta në qytete dhe qyteza anembanë Rusisë në orën 19:00 me orën lokale.

"Ju nuk duhet të vdisni për Putinin. Ju nevojiten në Rusi ata që ju duan. Për autoritetet, ju jeni vetëm mish për top dhe do të shpërdoroheni pa asnjë kuptim dhe qëllim", u thanë organizatorët rusëve.

Autoritetet kërcënojnë protestuesit me 15 vite burg

Zyra e prokurorit të Moskës tha se pjesëmarrja në protesta dhe "ngjarje masive" të paligjshme është një vepër e dënueshme që mund të rezultojë në "deri në 15 vjet burg".

Më herët, opozita dhe aktivistët rusë bënë thirrje për protesta kundër mobilizimit të pjesshëm të urdhëruar nga presidenti rus Vladimir Putin të mërkurën.

Autoritetet ruse deri më tani kanë shtypur protestat dhe projekti i pavarur i medias për të drejtat e njeriut OVD-info vlerëson se 16,437 persona janë arrestuar që nga fillimi i luftës në Ukrainë më 24 shkurt. /Nacionale/