ShBA dënon për trafik droge një ish-ministër meksikan
Një ish-ministër i sigurisë meksikane është dënuar nga një juri amerikane për trafik droge.
Genaro Garcia Luna, dikur fytyra e luftës së Meksikës kundër drogës, është shpallur fajtor për marrjen e miliona dollarëve nga grupi më i madh i krimit në Meksikë, karteli i drogës Sinaloa.
Garcia Luna, i arrestuar në vitin 2019 në Teksas ishte deklaruar i pafajshëm, por tani pas dënimit ai mund të përballet deri me 10 vite burg.
Raportohet se ky vendim ka ardhur pas një gjyqi katër-javor të mbajtur në Gjykatën e Qarkut të ShBA-së në Brooklyn.
Sipas prokurorëve, ish-kreu i ekuivalentit meksikan të Byrosë Federale të Hetimeve të ShBA-së ka pranuar miliona dollarë të mbushura në çanta dhe të dorëzuara nga anëtarët e kartelit.
Garcia Luna, është zyrtari më i lartë meksikan që është gjykuar ndonjëherë në ShBA për akuzat e trafikut të drogës.
