SHBA arrestoi një numër rekord prej 210,000 emigrantësh në kufirin e saj me Meksikën muajin e kaluar

Autoritetet kufitare të SHBA-së arrestuan 210,000 emigrantë në mars në përpjekjet e tyre për të kaluar kufirin me Meksikën, shifra më e lartë mujore në 20 vjet dhe lë të kuptohet si sfidë me të cilën mund të përballet presidenti amerikan Joe Biden në muajt e ardhshëm.

Kjo është një rritje prej 24 përqind krahasuar me të njëjtin muaj të vitit të kaluar, kur në kufi u ndaluan 169 mijë emigrantë. Në atë kohë u vu re një rritje e migracionit dhe një nga pasojat ishin mijëra fëmijë të pashoqëruar që mbetën për ditë të tëra të “ngujuar” në stacionet e patrullave kufitare të mbushura me njerëz.

Biden premtoi ndryshim

Joe Biden, një demokrat që mori detyrën në janar të vitit 2021, është zotuar të ndryshojë një sërë politikash për imigracionin, politika të ngulitura nga ish-presidenti Donald Trump.

Republikanët, të cilët shpresojnë të rimarrin kontrollin e Kongresit në zgjedhjet e 8 nëntorit, argumentojnë se braktisja e politikës së kohës së Trump nga Biden ka nxitur edhe më shumë imigrim të paligjshëm.

Zyrtarët e administratës Biden paralajmërojnë se migrimi mund të rritet më tej pasi zyrtarët shëndetësorë të SHBA-së njoftuan heqjen e një urdhërese kufitare nga koha e pandemisë që zgjat deri më 23 maj.

Ata dëbuan gjysmën e emigrantëve

Rregullorja lejon që azilkërkuesit dhe migrantët e tjerë të dëbohen në Meksikë sa më shpejt të jetë e mundur për të parandaluar përhapjen e Covid-19.

Në muajt e fundit, më shumë se gjysma e emigrantëve në kufirin SHBA - Meksikë kanë ardhur nga vende si Meksika, Guatemala, Hondurasi dhe El Salvadori, por gjithnjë e më shumë emigrantë kanë ardhur kohët e fundit nga vende më të largëta, si Ukraina dhe Rusia.

Sipas të dhënave zyrtare nga doganat dhe autoritetet kufitare, numri prej 210,000 migrantësh të arrestuar në kufi në mars është numri më i lartë total mujor i emigrantëve i regjistruar që nga shkurti i vitit 2000.

Rreth gjysma e emigrantëve që tentuan të kalonin kufirin në mars të këtij viti u dëbuan. /Nacionale/