Rusia thotë se lufta në Ukrainë mund të eskalojë nga veprimet e një ose dy vendeve të NATO-s
Rusia paralajmëroi të mërkurën se lufta në Ukrainë mund të dalë nga kontrolli dhe të zgjerohet gjeografikisht për shkak të veprimeve të pamenduara të një ose dy shteteve të NATO-s.
Të mërkurën, presidenti rus, Vladimir Putin, i tha Perëndimit se Rusia është teknikisht e gatshme për luftë bërthamore dhe se nëse ShBA-ja dërgon trupa në Ukrainë, ky veprim do të konsiderohej eskalim i konsiderueshëm i konfliktit, raporton agjencia “Reuters”.
Zëdhënësja e Ministrisë së Jashtme të Rusisë, Maria Zakharova, u tha gazetarëve të mërkurën se gjendja përreth Ukrainës po bëhej e rrezikshme dhe se rreziqet ishin duke u rritur.
“Si rezultat i veprimeve provokuese e të pamenduara të edhe një ose dy shteteve anëtare të BE-së ose NATO-s, kriza ukrainase do të mund të shkonte absolutisht përtej kufijve të saj gjeografikë, të fitonte një shkallë tërësisht ndryshe dhe të zhvillohej në mënyrë të pakontrolluar” – tha Zakharova në një konferencë për gazetarë.
“Në përputhje me rrethanat, pyetja sot është se si të shmangen rreziqet e eskalimit të mëtejmë. Ato janë të qarta dhe të frikshme për të gjithë njerëzit e ndjeshëm” – shtoi Zakharova, duke e këshilluar Perëndimin që të heqë dorë nga ideja e mposhtjes strategjike të Rusisë dhe ta ndërpresë përkrahjen e Ukrainës me të holla e armë.
“Perëndimi do të duhet të mësojë që të mendojë jo vetëm me ambiciet e veta gjeopolitike, por edhe me interesat legjitime të shteteve të tjera” – tha zëdhënësja ruse.
“Unë jam mirë e vetëdijshme se kjo do të shkaktojë kërcëllimë dhëmbësh në kuptimin e fjalëpërfjalshëm, por do të duhet të bëhet në një pikë dhe sa më shpejt që bëhet, më pak njerëz do të vdesin dhe më pak njerëz, në parim, do të vuajnë” – shtoi ajo.
