Rusia thotë se ende s’ka marrë ndonjë lajm rreth bisedimeve ShBA – Ukrainë në Florida
Zëdhënësi i Kremlinit, Dmitry Peskov, tha të hënën se Moska nuk ka marrë ndonjë lajm rreth rezultatit të bisedimeve në Florida të ShBA-së për një zgjidhje rreth Ukrainës mes zyrtarëve amerikanë e ukrainas.
“Për momentin, ne nuk e dimë rezultatin e bisedimeve mes ukrainasve dhe amerikanëve në Florida” – citohet të ketë thënë Peskovi, sipas raportimit të agjencisë ruse të lajmeve, RIA.
“Kur të marrim lajme, do të jetë e qartë se si dhe në çfarë drejtimi do të veprojmë tutje” – shtoi ai, transmeton agjencia "Reuters".
Dy palët u takuan në Florida deri të shtunën, pasi emisari i presidentit Donald Trump, Steve Ëitkoff, dhe dhëndri i tij, Jared Kushner, u takuan me presidentin rus, Vladimir Putin, në Kremlin për të diskutuar një plan të mbështetur nga Uashingtoni për zgjidhjen e luftës që nisi më 2022.
Presidenti ukrainas, Volodymyr Zelensky, i përshkroi bisedimet në Florida si “konstruktive, edhe pse jo të lehta”.
Zelensky tha të hënën se vendi i tij do të ndajë me ShBA-në të martën një plan të rishikuar të paqes.
Ai të hënën zhvilloi diskutime në Londër me kryeministrin britanik, Keir Starmer, presidentin francez, Emmanuel Macron, dhe kancelarin gjerman, Friedrich Merz.
