“Rusia po përdor raketa me aftësi bërthamore në Ukrainë”
Ushtria ukrainase ka thënë se për të shteruar mbrojtjen ajrore të Ukrainës, Rusia tani ështëë duke përdorur raketa me aftësi bërthamore me koka jo-eksplozive.
Në një konferencë në kryeqytetin e Ukrainës, Kiev, zyrtari ushtarak Mykola Danyliuk u tregoi gazetarëve ato që ai i përshkroi si fragmente të raketave të lundrimit X-55 (të njohura si AS-15 nga NATO), për të cilat tha se janë gjetur në rajonet Lviv dhe Khmelnytsky.
“Raketat po lëshohen për të shteruar sistemin e mbrojtjes ajrore të vendit tonë", tha ai, duke shtuar se “testet në fragmente nuk treguan nivele jonormale të radioaktivitetit.”
Ndërsa, Mbretëria e Bashkuar tha se raketat ishin projektuar "ekskluzivisht si një sistem shpërndarjeje bërthamore". Megjithatë, besohet se ushtria ruse ka hequr kokat bërthamore nga raketat e lëshuara dhe i ka zëvendësuar ato me një sistem inert.
Danyliuk theksoi se edhe një raketë e armatosur me një kokë jo-eksplozive "paraqiste një rrezik të madh" për shkak të energjisë së saj kinetike dhe mbetjeve të karburantit.
Ndërkohë, ekspertët ushtarakë ukrainas thonë se, Rusisë mund t’i jetë varfëruar ndjeshëm arsenali i saj i madh i raketave, pas sulmeve të njëpasnjëshme që kreu në infrastrukturën kritike të Ukrainës javët e fundit.
E edhe një raport i dhënë nga inteligjenca e Mbretërisë së Bashkuar në muaji nëntori, doli në përfundime të ngjashme.
Megjithatë, Rusia - e cila filloi një pushtim të plotë të Ukrainës më 24 shkurt – ende nuk ka bërë asnjë koment publik mbi këtë çështje.
