Rikthehen tensionet: Garda Revolucionare e Iranit mbyll Hormuzin “deri në heqjen e bllokadës amerikane”
Irani ka shtrënguar sërish kontrollin mbi Ngushticën e Hormuzit të shtunën, duke deklaruar se Ngushtica është "nën kontroll të rreptë" nga forcat iraniane, vetëm pak orë pasi zyrtarët iranianë dhe Presidenti Trump kishin rritur shpresat për t'i dhënë fund luftës duke njoftuar se rruga ujore ishte rihapur.
Ushtria e Iranit tha në deklaratë se ngushtica tani ishte "kthyer në gjendjen e saj të mëparshme", me përjashtim të rastit nëse Shtetet e Bashkuara do t'i jepnin fund bllokadës së tyre ndaj porteve iraniane. Një agjenci monitorimi e lundrimit, e drejtuar nga marina britanike, tha të shtunën se kishte marrë një raport se Gardianët e Revolucionit të Iranit kishin qëlluar drejt një anijeje cisternë në ngushticë.
Sipas The New York Times, këto zhvillime kanë shtuar konfuzion të shtunën lidhur me statusin e tranzitit nëpër ngushticë, ku Irani ka penguar furnizimet globale të energjisë duke kërcënuar anijet kalimtare gjatë më shumë se një muaji luftë me Shtetet e Bashkuara dhe Izraelin.
Vetëm një ditë më parë, ministri i jashtëm i Iranit e quajti ngushticën "plotësisht të hapur", gjë që e shtyu presidentin Trump të deklaronte pikë kthese në negociatat mes dy vendeve për një armëpushim të përhershëm.
Por, të dyja vendet e zbehën menjëherë optimizmin.
Zyrtarët iranianë këmbëngulën se anijet ende kishin nevojë për lejen e Iranit për të kaluar. Trump tha se bllokada detare amerikane ndaj porteve të Iranit do të vazhdonte derisa të arrihej një marrëveshje për t'i dhënë fund luftës, duke provokuar zemërimin e iranianëve dhe zotimet për hakmarrje, sipas The Times.
Trump gjithashtu u tha gazetarëve të shtunën se Irani ishte përpjekur ta "mbyllte sërish ngushticën". Por, ai shfaqi menjëherë optimizëm të mëtejshëm rreth perspektivës për një marrëveshje. "Në fakt, gjërat po ecin shumë mirë," shtoi ai.
Trump kishte pretenduar në një intervistë telefonike me CBS të premten se Irani kishte "rënë dakord për gjithçka". Por, sipas The Times, kryenegociatori i Iranit, Mohammad Bagher Ghalibaf, mohoi shpejt që Irani të kishte rënë dakord me ndonjë nga kërkesat thelbësore të kundërshtarëve të tyre.
Njoftimi i rihapjes së ngushticës kishte qetësuar çmimet e energjisë të premten, duke bërë që kontratat e së ardhmes për naftën të binin ndjeshëm në rreth $90 për fuçi. Tregjet e naftës janë të mbyllura gjatë fundjavës.
Irani kishte kërkuar që armëpushimi me Shtetet e Bashkuara të shtrihej edhe në Liban si kusht për një marrëveshje më të gjerë. Z. Trump dhe zyrtarët e SHBA-së punuan për ta bërë këtë realitet, edhe pse mohuan se po përpiqeshin të plotësonin kushtet e Iranit.
