Reuters: Sulmet iraniane i shkaktojnë Katarit humbje miliardëshe në sektorin e gazit
Sulmet e fundit nga Irani kanë shkaktuar një goditje të rëndë në sektorin energjetik të Katarit, duke nxjerrë jashtë funksionit rreth 17% të kapacitetit të eksportit të gazit natyror të lëngshëm (LNG) për një periudhë që mund të zgjasë deri në pesë vite. Lajmi është konfirmuar nga drejtues të lartë të sektorit energjetik të vendit, sipas raportimit të agjencisë ndërkombëtare Reuters.
Sipas Reuters, duke cituar drejtuesit, dëmet e shkaktuara nga sulmet kanë detyruar autoritetet e Katarit të ndërpresin një pjesë të konsiderueshme të prodhimit, duke shkaktuar humbje të vlerësuara në rreth 20 miliardë dollarë në vit. “Sulmet iraniane kanë nxjerrë jashtë funksionit 17% të kapacitetit të eksportit të LNG të Katarit,” raportoi Reuters, duke cituar drejtuesin e QatarEnergy, Saad al-Kaabi.
Dy nga 14 linjat e prodhimit të LNG-së dhe një nga dy impiantet e konvertimit të gazit në lëndë të lëngshme janë dëmtuar rëndë. Si pasojë, rreth 12.8 milionë tonë LNG në vit do të mbeten jashtë tregut global për një periudhë tre deri në pesë vjet. Kjo ndërprerje pritet të ketë ndikim të drejtpërdrejtë në furnizimet me energji për tregje kyçe në Evropë dhe Azi.
Në një reagim, Kaabi u shpreh: “Nuk do ta kisha imagjinuar kurrë që Katari do të përballej me një sulm të tillë, sidomos nga një vend mysliman gjatë muajit të Ramazanit.” Kjo deklaratë pasqyron tensionin e lartë gjeopolitik që po përfshin rajonin e Gjirit.
Për shkak të situatës, QatarEnergy është detyruar të shpallë forcë madhore (force majeure) në kontratat afatgjata të furnizimit me gaz për disa vende, përfshirë Italinë, Belgjikën, Korenë e Jugut dhe Kinën. “Këto janë kontrata afatgjata që duhet t’i pezullojmë për shkak të rrethanave,” tha Kaabi për Reuters.
Ndikimi i sulmeve nuk kufizohet vetëm te LNG. Eksportet e produkteve të tjera energjetike dhe nënprodukteve do të bien ndjeshëm: kondensati pritet të ulet me 24%, gazi i lëngshëm i naftës (LPG) me 13%, heliumi me 14%, ndërsa nafta e lehtë dhe squfuri me rreth 6%.
Ekspertët, sipas Reuters, paralajmërojnë se pasojat mund të jenë afatgjata. Sipas Kaabi, dëmi i shkaktuar nga këto sulme mund ta kthejë zhvillimin energjetik të rajonit pas me 10 deri në 20 vite. Ndërkohë, projektet madhore të zgjerimit të fushës së gazit North Field mund të përballen me vonesa të konsiderueshme.
