Putin thirri një takim të rëndësishëm
Presidenti rus Vladimir Putin ka thirrur një takim të Këshillit të tij të Sigurimit, një format që mbledh së bashku ministra kyç, zyrtarë politikë dhe përfaqësues të shërbimeve të sigurisë dhe ushtrisë, për të hënën, njoftoi Kremlini.
“Takimi i presidentit me anëtarët e përhershëm të Këshillit të Sigurimit është planifikuar për nesër”, tha zëdhënësi i Putinit, Dmitry Peskov. Ky takim do të zhvillohet dy ditë pasi një shpërthim dëmtoi urën e Krimesë.
Ministria ruse e Transportit ka njoftuar se trafiku hekurudhor nëpër urë po zhvillohet sipas orarit. Nga ana tjetër, drejtuesit e mjeteve duhet të presin me orë të tëra për të kaluar urën, raportojnë mediat.
Radhë të gjata në urë
Radhë të gjata janë krijuar në të dy anët e urës pasi po kryhen kontrolle të rrepta të automjeteve. Disa shoferë shkruan në rrjetet sociale se u deshën nga 6 deri në 12 orë për të kaluar urën 19 kilometra të gjatë.
Të shtunën, Putin urdhëroi shërbimin e inteligjencës FSB të forcojë sigurinë e urës që lidh Rusinë me Krimenë, si dhe infrastrukturën për furnizimin me energji elektrike dhe gaz të gadishullit, njoftoi agjencia Interfax nga Moska.
Një shpërthim në Urën e Krimesë, një objekt me rëndësi strategjike rrugore dhe hekurudhore që lidh Gadishullin e Krimesë me Rusinë, rrëzoi një pjesë me dy korsi të urës të shtunën. Dëmet janë të mëdha dhe një pjesë e rrugës u rrëzua pjesërisht në ujë dhe të paktën tre persona vdiqën, thanë zyrtarët rusë.
Rusia pushtoi Krimenë në vitin 2014 dhe ura 19 kilometra e gjatë, e cila lidh gadishullin me rrjetin rrugor dhe hekurudhor të Rusisë, u hap me një festë të madhe nga presidenti rus katër vjet më vonë. Rusia nuk e ka akuzuar Ukrainën për sulmin ndaj urës dhe zyrtarët ukrainas nuk e kanë marrë përgjegjësinë. /Nacionale/
