Putin dhe Kim Jong Un i bashkohen Xi Jinping-ut në paradë: Bota në mes të ‘paqes ose luftës’
Presidenti i Kinës, Xi Jinping tha se bota po përballet me një zgjedhje "mes paqes ose luftës", teksa mbajti paradën më të madhe ushtarake ndonjëherë të Kinës, ku u bashkua edhe me Vladimir Putinin dhe Kim Jong-unin, në një shfaqje sfiduese ndaj Perëndimit.
Putin dhe Kim, udhëheqësit autoritarë të Rusisë dhe Koresë së Veriut, ishin mes dhjetëra liderëve botërorë që morën pjesë në paradë, një demonstrim i madh i pajisjeve dhe trupave ushtarake, i organizuar për të shënuar 80-vjetorin e përfundimit të Luftës së Dytë Botërore, të cilën Kina e quan Lufta e Rezistencës kundër Agresionit Japonez.
“Sot, njerëzimi përballet sërish me zgjedhjen mes paqes ose luftës, dialogut ose konfrontimit, fitoreje të përbashkët ose loje me rezultat zero,” tha Xi përpara turmës prej më shumë se 50,000 spektatorësh, duke shtuar se populli kinez “qëndron me vendosmëri në anën e duhur të historisë”.
Ai tha se Kina ishte një komb i madh që “nuk frikësohet kurrë nga ngacmuesit”, duke iu referuar në mënyrë të tërthortë SHBA-së dhe aleatëve të saj, dhe paralajmëroi se Kina ishte “e pandalshme”.
Pas fjalimit të tij, Xi u ngjit në një makinë me tavan të hapur për të inspektuar paradën, duke përshëndetur trupat dhe duke marrë nderime, teksa kilometra të tëra me pajisje ushtarake kalonin para tij dhe avionë luftarakë fluturonin mbi krye.
Ngjarja vulosi një javë shfaqjesh diplomatike në Kinë, ku Xi priti dhjetëra liderë në Tianjin, në një përpjekje për të ngritur lart grupet e udhëhequra nga “Jugu Global” – dhe të drejtuara nga Kina – mbi grupet e udhëhequra nga Perëndimi, si NATO. Fushata shumëvjeçare është ndihmuar nga tarifat tregtare të presidentit amerikan Donald Trump dhe politikat e tij të paqëndrueshme, të cilat kanë tensionuar marrëdhëniet me aleatët dhe rivalët njëkohësisht.
Por ishte pamja e paprecedentë e tre liderëve autokratë që bisedonin dhe shtrëngonin duart teksa ecnin mbi qilimin e kuq në Sheshin Tiananmen të mërkurën, ajo që sipas analistëve dërgoi mesazhin më të fortë të sfidës ndaj Perëndimit, shkruan The Guardian.
“Pekini po dërgon një mesazh … se edhe nëse vendet perëndimore vazhdojnë të sanksionojnë Rusinë për luftën Rusi-Ukrainë, Pekini nuk do të ketë frikë të qëndrojë pranë mikut të tij,” tha Ëen-Ti Sung, një bashkëpunëtor i jashtëm në Global China Hub të Këshillit Atlantik./foto: AFP
