Pelosi, Clooney e senatorë demokratë ngrenë dyshime të reja për Bidenin
Presidenti amerikan, Joe Biden, u ballafaqua me dyshime të reja të mërkurën rreth gjasave të tij për t’i fituar zgjedhjet nga dy figura të rëndësishme, Nancy Pelosi e George Clooney, të cilët mund të kenë ndikim te ligjvënës të tjerë demokratë e donatorë financiarë, si dhe nga dy demokratë të Senatit.
Pelosi, ish-kryetare e Dhomës së Përfaqësuesve dhe aleate e vjetër e Bidenit, tha se presidenti duhet të vendosë shpejt nëse do të qëndrojë në garë për Shtëpinë e Bardhë, ndërsa refuzoi të thoshte përfundimisht nëse ajo donte që veterani të ishte i nominuar i Partisë Demokratike, raporton agjencia “Reuters”.
Ylli i Hollivudit, Clooney, demokrat që kishte organizuar një tubim për grumbullimin e fondeve për Bidenin muajin e kaluar, e tërhoqi mbështetjen e tij për presidentin përmes një opinioni të publikuar në gazetën “The New York Times”, ku tha se Bideni nuk është njeriu i njëjtë që ishte më 2020.
Ndërkohë, udhëheqësi i shumicës në Senat, Chuck Schumer, privatisht ka dhënë shenjë se është i hapur për një kandidat tjetër demokrat pos Bidenit, sipas uebfaqes amerikane të lajmeve, “Axios”. Megjithatë, Schumeri e ritheksoi përkrahjen për presidentin në një deklaratë pas publikimit të raportit të këtij mediumi.
Senatori Peter Welch i bëri thirrje Bidenit që të tërhiqej nga gara në një opinion të publikuar të mërkurën vonë. Ai është senatori i parë demokrat që haptazi bën thirrje për largimin e presidentit nga fushata e zgjedhjeve presidenciale.
Një donator i rëndësishëm tha se udhëheqësit demokratë kishin dhënë shenjë se do të lëshonin deklarata për shqetësim pas samitit të NATO-s, por nuk e përmendi me emër Schumerin.
“Do të jetë gjakderdhje” – tha burimi, duke e cituar zemërimin në rritje në mesin e ligjvënësve dhe donatorëve, si dhe presionin në rritje ndaj kandidatëve për pozita më të ulëta.
Fushata “Braktiseni Bidenin”, e cila e ka kundërshtuar kandidaturën e presidentit për shkak të mënyrës së trajtimit të luftës në Gaza, të mërkurën i bëri thirrje të gjithë amerikanëve që t’ia kërkonin tërheqjen Bidenit.
