Pas një muaji, Ukraina pranon se ishte prapa sulmeve ajrore në Krime
Pas një muaji pasigurie se kush ishte pas sulmeve ajrore që goditën Krimenë, më në fund Ukraina ka marrë përgjegjësinë.
Një nga sulmet, i cili ndodhi në fillim të gushtit, kishte në shënjestër bazën ushtarake ruse Saky dhe vrau një person.
Deri më tani Ukrainë ka refuzuar të pranojë rolin e saj në sulme, duke fajësuar Rusinë.
Por, në një artikull të fundit për agjencinë kombëtare të lajmeve Ukrinform, komandanti i lartë i Kievit, Valeriy Zaluzhnyi, ka njoftuar se raketat ukrainase kishin shënjestruar një numër vendesh ushtarake të Krimesë, duke përfshirë bazën ajrore Saky e cila u trondit nga shpërthime të shumta më 9 gusht.
Ai pretendoi se sulmi - kundër një baze të përdorur nga Moska për të nisur sulmet kundër Ukrainës - nxori "jashtë veprimit" 10 avionë luftarakë rusë.
Ndërsa, përveç dëmtimit të aftësive ushtarake të Rusisë, Zaluzhnyi tha se synohej të sfidonte besimin e përgjithshëm ushtarak të Rusisë dhe ndjenjën e mosndëshkimit.
Ai shtoi se, sulmet ishin pjesë e një përgjigjeje të qëllimshme ndaj përpjekjeve ruse për t'i larguar civilët e saj nga konflikti.
Baza ajrore Saky është afër Novofedorivka në bregun perëndimor të Krimesë, një zonë plazhi e njohur për turistët rusë.
E që nga fillimi i pushtimit rus, sulmi në Saky ishte i pari që Ukrainë kishte bërë në Krime, por kohët e fundit gadishulli i kontrolluar nga Rusia është bërë objekt i një numri në rritje të kërcënimeve ushtarake ukrainase.
Pretendimi i Ukrainës për rolin e saj në sulmin e gushtit shënon një ndryshim të ashpër nga qëndrimi i saj i mëparshëm zyrtar se ajo nuk ishte e përfshirë.
Në një moment, ministri i mbrojtjes i Ukrainës sugjeroi se shpërthimi i Saky mund të ishte shkaktuar nga pirja e pakujdesshme e duhanit nga ushtarët rusë.
"Duket sikur ata i hodhën bishtat e cigareve në disa vende në të njëjtën kohë," është shprehur më parë, Oleksii Reznikov për një media daneze.
E nga ana tjetër, autoritetet e Krimesë të instaluara nga Rusia kanë refuzuar të akuzojnë drejtpërdrejt Ukrainën për përgjegjësi.
Në vend të kësaj, zyrtarët lokalë kanë thënë se shpërthimet në bazën ajrore Saky, ishin shkak i një shpërthimi të pashpjegueshëm të municionit, përpara se të thonin se ishin, "akte sabotimi".
Kujtojmë se, Rusia aneksoi Krimenë nga Ukraina në mars të vitit 2014, pas një referendumi që u pa si i paligjshëm nga komuniteti ndërkombëtar.
