OKB-ja thotë se sulmet izraelite ndaj Libanit mund të përbëjnë krime lufte
Sulmet izraelite ndaj ndërtesave të banimit dhe infrastrukturës civile në Liban mund të përbëjnë krime lufte, sipas zyrës së OKB-së për të drejtat e njeriut.
Vlerësimi vjen kur të paktën 912 njerëz, përfshirë 111 fëmijë, janë vrarë e 2.221 të tjerë janë plagosur nga sulmet izraelite ndaj fqinjit verior nga 2 marsi, sipas të dhënave më të reja të Ministrisë së Shëndetësisë në Liban. Më shumë se një milion njerëz – gati 20 për qind e popullsisë – janë zhvendosur, shkruan gazeta “The Guardian”.
Në një konferencë për media të martën në Gjenevë, zëdhënësi i kësaj zyre, Thameen al-Kheetan, tha: “Në shumë raste, sulmet ajrore izraelite kanë shkatërruar ndërtesa të tëra të banimit në mjedise të dendura urbane, me shumë anëtarë të familjes së njëjtë, përfshirë gra e fëmijë, shpesh të vrarë së bashku.”
Al-Kheetan paralajmëroi se “sulme të tilla ngrenë shqetësime serioze sipas së drejtës humanitare ndërkombëtare”.
Ai theksoi se civilë të zhvendosur libanezë që jetonin në tenda përgjatë bregdetit të Bejrutit u vranë nga sulmet izraelite, ndërsa sulme të tjera nga fillimi i marsit kanë lënë të vdekur të paktën 16 punëtorë shëndetësorë.
“E drejta humanitare ndërkombëtare kërkon dallim mes caqeve ushtarake dhe civilëve e objekteve civile dhe këmbëngul në ndërmarrjen e masave të zbatueshme paraprake për t’i mbrojtur civilët. Sulmi i qëllimshëm ndaj civilëve ose objekteve civile përbën krim lufte” – shtoi zëdhënësi.
Al-Kheetan tha se edhe luftëtarët e Hezbollahut kanë vazhduar që të lëshojnë “breshëri raketash pa dallim drejt Izraelit”, ku të paktën 13 njerëz janë vrarë që nga fillimi i luftës./Nacionale
