Objekti i rrëzuar nga ShBA mund të ketë qenë një balonë 12 dollarëshe
Një grup entuziastësh amatorë të balonave në Illinois mund të kenë zgjidhur misterin e një prej objekteve të panjohura fluturuese të rrëzuara nga ushtria amerikane javën e kaluar.
Sipas The Guardian, Brigada e Balonave në Illinois ka thënë se një nga mjetet e saj për hobi "ka humbur në veprim" mbi Alaskë më 11 shkurt, në të njëjtën ditë që një avion amerikan F-22 rrëzoi një objekt të paidentifikuar ajror jo shumë larg mbi territorin kanadez Yukon.
Në një postim në blog, grupi nuk i ka lidhur dy ngjarjet, por trajektorja e balonës përpara regjistrimit të saj të fundit elektronik ka sugjeruar se mund të ketë një lidhje.
Nëse kjo është ajo që ka ndodhur, kjo do të thotë se ushtria amerikane ka shpenzuar një raketë që kushton 439,000 dollarë për të rrëzuar një balonë të padëmshme me vlerë rreth 12 dollarë.
Objekti mbi Yukon ishte i dyti nga tre të rrëzuar me urdhër të Joe Biden në ditët e njëpasnjëshme fundjavën e kaluar pasi një balonë spiune kineze - një objekt i katërt i veçantë - u rrëzua mbi Atlantik pasi kaloi bregun e Karolinës së Jugut më 4 shkurt.
Zyrtarët amerikanë kanë thënë gjatë javës se tre objektet e rrëzuara pas shkatërrimit të balonës së spiunazhit kinez ishin ndoshta “të padëmshme” dhe mund të kishin qenë komerciale ose të lidhura me kërkime të motit.
Kujtojmë se një ditë më parë, pas një presioni të madh Biden theu heshtjen, duke thënë se, "asgjë tani nuk sugjeron se objektet ishin të lidhura me programin e balonave të spiunazhit të Kinës ose se ato ishin mjete vëzhgimi nga ndonjë vend tjetër".
Sipas faqes në internet, Brigada e Illinois është një "grup i vogël entuziastësh i balonave pico", i cili ka funksionuar që nga qershori 2021.
Aty thuhet se balonat ngjajnë me avionët komercialë, ndërsa përmbajnë gjurmues, panele diellore dhe paketa antenash më të lehta se një zog i vogël, si dhe mbushen duke përdorur më pak se një metër kub gaz.
Sipas Aviation Ëeek, ato janë balona të vogla hobi që fillojnë me një çmim prej rreth 12 dollarë.
