Nëntë anëtarë të NATO-s mbështetën hyrjen e Ukrainës

Nëntë anëtarë të NATO-s nga Evropa Qendrore dhe Lindore mbështetën Ukrainën në përpjekjet e saj për t'u bërë anëtare e asaj aleance ushtarake dhe u bënë thirrje të 30 anëtarëve të NATO-s të rrisin dërgimin e ndihmës ushtarake në Kiev.

Presidenti ukrainas Zelenskiy njoftoi të premten se Ukraina ka paraqitur një kërkesë për anëtarësim në NATO sipas një procedure të përshpejtuar. Ai e bëri atë menjëherë pasi Vladimir Putin njoftoi aneksimin e katër rajoneve të okupuara të Ukrainës në Kremlin.

Megjithatë, në mënyrë që Ukraina të pranohet në NATO, të 30 anëtarët duhet të miratojnë kërkesën, prandaj nuk ka gjasa që Ukraina së shpejti të bëhet anëtare e Aleancës së Atlantikut të Veriut. Për më tepër, fakti që Ukraina është në luftë me Rusinë e ndërlikon më tej hyrjen në NATO.

"Ne u bëjmë thirrje aleatëve që të rrisin ndjeshëm dërgimin e ndihmës ushtarake në Ukrainë"

Liderët e Republikës Çeke, Estonisë, Letonisë, Lituanisë, Maqedonisë së Veriut, Malit të Zi, Polonisë, Rumanisë dhe Sllovakisë lëshuan një deklaratë të përbashkët ku thuhet: "Ne mbështesim Ukrainën në mbrojtjen e saj kundër pushtimit rus dhe kërkojmë që Rusia të tërheqë menjëherë të gjitha forcat e saj nga territoret e pushtuara. Përveç kësaj, ne u bëjmë thirrje të gjithë aleatëve që të rrisin ndjeshëm dërgimin e ndihmës ushtarake në Ukrainë".

Në deklaratë thuhet se krerët e 9 anëtarëve të NATO-s "mbështesin fuqimisht vendimin nga samiti i NATO-s i mbajtur në Bukuresht në 2008 në lidhje me anëtarësimin e ardhshëm të Ukrainës". /Nacionale/