Le Pen: Është koha që Franca të drejtohet ndryshe, elita po lufton kundër popullit

Ka ardhur koha që Franca të qeveriset ndryshe, tha kandidatja presidenciale e së djathtës ekstreme Marine Le Pen në një tubim parazgjedhor, me ndërprerje të shpeshta nga një turmë entuziaste që brohoriste: "Ne do të fitojmë!"

Vetëm dhjetë ditë para raundit të dytë të zgjedhjeve presidenciale, sondazhet tregojnë se presidenti aktual Emmanuel Macron ka një avantazh të lehtë ndaj Le Pen.

“Në këto zgjedhje, elita po lufton popullin”

Fituesi është i pasigurt dhe disa mijëra mbështetës të Marina Le Pen u mblodhën në qytetin jugor të Avignon, duke thirrur me besim emrin e saj dhe duke valëvitur flamujt francezë. “Ne po propozojmë një projekt vërtet alternativ”, tha Le Pen.

“Në këto zgjedhje, elita po lufton popullin”, shtoi ajo, duke u bërë thirrje qytetarëve që ta ndihmojnë për të luftuar “sistemin e rraskapitur”.

"Unë po u them abstenuesve të zgjedhjeve: ejani dhe votoni. Nëse populli voton, populli do të fitojë", tha Le Pen.

Le Pen, e cila ishte gjithashtu kandidate në dy zgjedhjet e mëparshme presidenciale, është më popullore se kurrë, pasi zbuti me sukses imazhin e saj dhe e fokusoi fushatën e saj në rritjen e kostove të jetesës.

Ajo nuk ka hequr dorë nga themelet e platformës së saj anti-emigrante dhe euroskeptike, por nuk është fokusi i saj në këto zgjedhje.

Përpara fjalimit të saj, Brigitte Bertrand, e cila erdhi në tubim, tha se po votonte për Le Pen për herë të tretë dhe ishte më entuziaste se kurrë për këtë. "Më pëlqen politika e saj", tha ajo.

Le Pen është shumë e njohur në pjesë të Francës jugore, por ka edhe shumë kundërshtarë. /Nacionale/