Përleshen fizikisht trupat ushtarake të Kinës e Indisë
Trupat indiane dhe kineze janë përleshur në kufirin e tyre të diskutueshëm të Himalajeve, incidenti i parë i njohur midis dy fuqive aziatike të armatosura me armë bërthamore në gati dy vjet.
Në një deklaratë të lëshuar, ministria e Mbrojtjes së Indisë, ka thënë se ushtarët nga të dy anët kanë përjetuar lëndime të lehta, në përballjen që është zhvilluar të premten në sektorin Tawanf në territorin verilindor të Arunachal Pradesh në Indi, vend që kufizohet me Kinën jugore.
Kufiri i diskutueshëm prej 3,379 kilometrash ka qenë prej kohësh burim i tensioneve midis Nju Delhit dhe Pekinit, me një përshkallëzim të ndjeshëm në qershor 2020 kur luftimet mes dy palëve rezultuan në vdekjen e të paktën 20 ushtarëve indianë dhe katër ushtarëve kinezë.
Duke folur me zyrtarët e drejtësisë të martën, ministri i Mbrojtjes i Indisë Rajnath Singh akuzoi trupat e Ushtrisë Çlirimtare Popullore të Kinës (PLA) se po përpiqen të ndryshojnë "në mënyrë të njëanshme" status quo-në duke u përpjekur të kalojnë vijën e kontrollit aktual (LAC) - kufirin de facto të dy vendeve.
“Përballja që pasoi çoi në një përleshje fizike në të cilën ushtria indiane me guxim parandaloi PLA-në që të kalonte në territorin tonë dhe i detyroi ata të ktheheshin në vendet e tyre”, është shprehur Singh, duke shtuar se nuk kishte lëndime serioze nga ana indiane.
Ndërkohë në deklaratën e saj të mëparshme, ministria e Mbrojtjes indiane tha se të dyja palët "u shkëputën menjëherë nga zona" dhe komandantët përkatës të vendeve atje mbajtën një takim urgjent për të diskutuar çështjen "në përputhje me mekanizmat e strukturuar për të rivendosur paqen dhe qetësinë".
