Javën e ardhshme në GjND nisin seancat për pretendimet për tortura në Siri
Gjykata Ndërkombëtare e Drejtësisë do të dëgjojë më 19 dhe 20 korrik një kërkesë të Holandës dhe Kanadasë që ky institucion ta urdhërojë Sirinë që t’i ndërpresë të gjitha aktet e torturës dhe të ndalimit arbitrar, si pjesë e një rasti me të cilin pretendohet se shteti aziatik ka shkelur një traktat të OKB-së kundër torturës.
Seanca në Pallatin e Paqes në Hagë do ta shënojë herën e parë që një gjykatë ndërkombëtare do t’i shqyrtojë pretendimet për abuzimet e kryera gjatë konfliktit 12-vjeçar, raporton agjencia “Reuters”.
Gjykata Ndërkombëtare e Drejtësisë, e njohur edhe si Gjykata Botërore, njoftoi muajin e kaluar se Holanda dhe Kanadaja kishin paraqitur një rast kundër Sirisë për shkeljen e konventës së OKB-së kundër torturës nga viti 2011.
Qeveria siriane dhe presidenti Bashar al-Assad i kanë mohuar akuzat për torturë dhe vrasje jashtëgjyqësore në luftën për të cilën Kombet e Bashkuara kanë thënë se ka shkaktuar qindra mijëra viktima.
Përmes kërkesës për masa urgjente, Kanadaja dhe Holanda kërkuan nga Gjykata që ta urdhërojë Sirinë që t’i ndalë të gjitha aktet e torturës dhe trajtimit mizor si dhe ndalimin arbitrar, mes veprimeve të tjera.
GjND-ja mund të lëshojë urdhra të tillë në përpjekje për t’u siguruar që situata të mos përkeqësohet gjatë disa viteve që zakonisht i nevojiten gjykatës për të marrë vendim për pretendimin kryesor.
Megjithatë, Gjykata Ndërkombëtare e Drejtësisë nuk ka fuqi për t’i zbatuar vendimet e saj.
Disa zyrtarë të regjimit sirian janë ndjekur penalisht për akte të torturës në raste të juridiksionit universal, sidomos në Gjermani, por ato raste përqendrohen në përgjegjësi kriminale individuale.
