Japonia i zbut rregullat e eksportit, përgatitet ta furnizojë ShBA-në me raketa “Patriot”
Japonia tha të premten se do të përgatitet për dërgimin e raketave të sistemit të mbrojtjes ajrore, “Patriot”, në ShBA pas rishikimit të udhëzimeve për eksportimin e armëve më herët këtë ditë. Kjo është zbutja e parë e rëndësishme e kufizimeve të eksportit të armëve në shtetin pacifist në nëntë vitet e fundit.
Ky njoftim vjen në kohën kur Japonia, shtet që për një kohë të gjatë ka pasur qëndrim kundër lejimit të eksportimit të armëve vdekjeprurëse, synon që ta fuqizojë industrinë e mbrojtjes në një mjedis gjithnjë më të tensionuar të sigurisë në rajonin e Indo-Paqësorit, raporton agjencia “Reuters”.
“Kjo mban domethënie të konsiderueshme në aspektin e fuqizimit të mëtejmë të aleancës Japoni – ShBA. Kjo do të kontribuojë jo vetëm për sigurinë e Japonisë, por edhe për paqen e stabilitetin në rajonin më të gjerë të Indo-Paqësorit”- tha sekretari i kabinetit qeveritar të Japonisë, Yoshimasa Hayashi, pas njoftimit.
Edhe pse masat e reja për eksportimin e armëve në Japoni prapë ia ndalojnë vendit dërgimin e armëve në shtete që janë në luftë, nga ky vendim mund të përfitojë tërthorazi Ukraina në luftën e saj kundër Rusisë, pasi ShBA-së i jepen kapacitete shtesë për t’i dhuruar Kievit ndihma ushtarake.
Një zyrtar qeveritar i Japonisë, që refuzoi të identifikohej për shkak të ndjeshmërisë së çështjes, tha se raketat do të përdoren për t’i mbushur rezervat e arsenalit të ShBA-së për sigurinë e Indo-Paqësorit.
Sistemi kundërajror “Patriot” është në mesin e armëve që Perëndimi ia ka dhuruar Ukrainës pas fillimit të pushtimit rus.
Sipas rregullave të mëparshme, Japonia mund të eksportonte vetëm pjesë të armëve, por jo edhe prodhime të kompletuara.
