Izraeli pritet ta bllokojë anijen protestuese të nisur drejt Gazës me Greta Thunbergun

Forca detare izraelite pritet që të bllokojë një mision aktivistësh të profilit të lartë, të cilët po lundrojnë drejt Gazës për ta sfiduar bllokadën e Izraelit, nëse anija u afrohet ujërave territoriale të Izraelit ditëve të ardhshme.

Në mesin e figurave që ndodhen në anijen me emrin “Madleen” janë: aktivistja e njohur për klimën, Greta Thunberg, aktori i “Game of Thrones”, Liam Cunningham, anëtarja franko-palestineze e Parlamentit Evropian, Rima Hassan, të cilës i është ndaluar hyrja në Izrael, si dhe aktivisti Brazilian, Thiago Avila, shkruan gazeta “The Times of Israel”.

Disa zyrtarë izraelitë të mbrojtjes i thanë kësaj gazete se janë duke e vëzhguar rrugën e lundrimit të anijes, përderisa ajo po bën një devijim për të marrë emigrantë sudanezë që po mundohen ta kalojnë Detin Mesdhe.

Megjithatë, nëse anija e vazhdon lundrimin drejt Gazës, ajo do të pengohet nga forca detare izraelite, thonë zyrtarët. Barka mund të dërgohet në portin e Ashdodit ose mund të lihet në det, raportoi më herët këtë javë transmetuesi publik izraelit, “Kan TV”.

Ushtria izraelite, duke iu përgjigjur një pyetjeje, tha se është “duke e zbatuar bllokadën detare të sigurisë ndaj Rripit të Gazës dhe është e përgatitur për një gamë të gjerë skenarësh që do t’i trajtojë në përputhje me udhëzimet e nomenklaturës politike”./Nacionale