Grupi Mashco Piro vret me shtiza dy sharrëxhi në Amazonë, dy të tjerë të zhdukur

Të paktën dy sharrëxhinj janë qëlluar për vdekje me heshta, një tjetër është lënduar dhe dy janë zhdukur pas një ballafaqimi me anëtarët e fisit “të pakontakutar” Mashco Piro në pjesën peruane të Amazonës, sipas aktivistëve për të drejtat e indogjenëve, që e kanë kritikuar Qeverinë se ka dështuar që ta njohë dhe ta mbrojë tërë territorin e këtyre njerëzve të izoluar.

Sulmi vdekjeprurës, që ndodhi të enjten e kaluar por u bë i ditur këtë javë, ndodhi një ditë para se Këshilli për Kujdestarinë e Pyjeve ta pezullonte për tetë muaj certifikatën e qëndrueshmërisë për një kompani të prerjes së drurëve, të cilën aktivistët e kanë akuzuar për cenim të tokës stërgjyshore të grupit, raporton gazeta “The Guardian”.

Grupet indogjene të Amazonës peruane dhe OJQ-ja “Mbijetesa Ndërkombëtare” ka kërkuar që organizata ndërkombëtare FSC ta anulojë në mënyrë të përhershme certifikatën për lëndë druri në Canales Tahuamanu, që kufizohet me rezervën ku jeton grupi i izoluar indogjen.

Sulmi ndaj sharrëxhinjve ndodhi afër Lumit Pariamanu në provincën Madre de Dios, në një zonë të territorit stërgjyshor të grupit Mashco Piro.

Muajin e kaluar, në të njëjtën zonë ndodhi një sulm i ngjashëm, kur të paktën një sharrëxhi u plagos, ndërsa më 2022, një sharrëxhi tjetër ishte vrarë me shtiza dhe një tjetër ishte lënduar.

Ministria e Kulturës e Perusë, që është përgjegjëse për të drejtat e njerëzve indogjenë, tha në një deklaratë se ishte duke i hulumtuar raportimet dhe duke e bashkërenduar punën me zyrën e prokurorit lokal dhe me policinë për të dislokuar një helikopter në zonën ku ka ndodhur incidenti./Nacionale