Gjermania po përgatitet për një krizë të rëndë: Vite të vështira janë përpara

Kancelari gjerman Olaf Scholz po përgatit qytetarët e Gjermanisë për rritje të mëtejshme të çmimeve.

“Kriza aktuale nuk do të përfundojë për disa muaj”, tha politikani socialdemokrat (SPD) në fillim të të ashtuquajturit “aksioni i përbashkët” me përfaqësuesit më të lartë të punëdhënësve dhe sindikatave në zyrën e kancelarit, shkruan Deutsche Welle

Lufta e Rusisë në Ukrainë dhe ndërprerja e zinxhirëve të furnizimit për shkak të pandemisë së coronavirusit kanë krijuar pasiguri të përgjithshme. “Ne duhet të përgatitemi për faktin se kjo situatë nuk do të ndryshojë në të ardhmen e parashikueshme”, tha Scholz. Gjermania po përballet me një “sfidë historike”.

Qëllimi i këtij takimi të parë në një seri takimesh është gjetja e instrumenteve për të ndalur rritjen e çmimeve. Rezultatet do të dihen vetëm në vjeshtë. "Si vend, ne do ta kalojmë mirë këtë krizë vetëm nëse bashkohemi, nëse gjejmë zgjidhje së bashku, dorë për dore", vuri në dukje Scholz. "Shoqëria është shumë më e fortë nga sa supozohet. Mesazhi që është i rëndësishëm për mua është se ne duhet të qëndrojmë së bashku", tha kancelari.

Kryetari i Shoqatës së Punëdhënësve: Na presin vite të vështira

Dhe presidenti i Shoqatës së Punëdhënësve, Rainer Dulger, sheh re të zymta në horizont. Vendi po përballet me krizën më të vështirë ekonomike dhe socio-politike që nga bashkimi. Ajo mund të kapërcehet vetëm me forca të përbashkëta. Rritja e vazhdueshme ekonomike, siç ekzistonte para pandemisë dhe fillimit të luftës në Ukrainë, "nuk është më diçka që merret si e mirëqenë". “Ne kemi vite të vështira përpara nesh”, paralajmëron Dulger.

Si një nga zgjidhjet e mundshme, Dulger sheh uljen e taksave dhe kontributeve të sigurimeve shoqërore - kjo do t'i lejonte qeverisë të linte më shumë para për qytetarët nga të ardhurat e tyre bruto.

Presidentja e Konfederatës së Sindikatave Gjermane (DGB), Yasmin Fahimi, beson se tani është e rëndësishme që "të bëjmë gjithçka që është e mundur për të parandaluar recesionin, stabilizimin e prodhimit dhe sigurimin e vendeve të punës".

Masat e qeverisë që tashmë janë miratuar do të lehtësojnë një familje mesatare prej rreth 1000 euro në vit. Megjithatë, ngarkesa është dukshëm më e lartë se kaq, thekson kreu i sindikatës. Edhe më herët Fahimi ka kërkuar vendosjen e një tavani për çmimet e energjisë.

Aksioni i përbashkët të kujton nismën e vitit 1967 me të njëjtin emër të nisur nga "Koalicioni i Madh" (Kristian Demokratë dhe Social Demokratë) në Gjermani. Ideja ishte që kriza e ardhshme dhe rritja e papunësisë do të kundërshtoheshin bashkërisht dhe se qeveria, autoritetet lokale, sindikatat dhe shoqatat e punëdhënësve, së bashku me bankën qendrore Bundesbank, do të vepronin në mënyrë të koordinuar. /Nacionale/