Gjenerali Tchiani e shpall veten udhëheqës shteti pas puçit në Niger
Gjenerali Abdourahmane Tchiani e ka shpallur veten udhëheqës të ri të Nigerit pas puçit ndaj presidentit Mohamed Bazoum.
I njohur edhe si Omar Tchiani, ai e nisi marrjen e pushtetit të mërkurën, kur njësiti i rojave presidenciale, të udhëhequra nga ai, e ndaluan presidentin, raporton televizioni BBC.
Puçi ushtarak e zhbëri tranzicionin e parë paqësor e demokratik të Nigerit që nga pavarësia e vendit më 1960.
Mendohet se presidenti Bazoum është me shëndet të mirë dhe ende duke u mbajtur nga rojat e veta.
Puçi është dënuar ashpër nga komuniteti ndërkombëtar, përfshirë Kombet e Bashkuara, Bashkimin Evropian dhe Unionin Afrikan.
Ushtaraku 62-vjeçar, Tchiani, ka qenë udhëheqës i rojave presidenciale nga viti 2011 dhe ishte promovuar në gradën e gjeneralit më 2018 nga ish-presidenti Mahamadou Issoufou.
