Forcimi i mbrojtjes së Ukrainës, Zelenskyy arrin në Downing Street

Presidenti ukrainas Volodymyr Zelenskyy ka mbërritur të premten në Downing Street për t’u takuar me kryeministrin Keir Starmer dhe për t’u bashkuar me liderë të tjerë evropianë në një telefonatë të “Koalicionit të vullnetit” për të diskutuar forcimin e mbrojtjes së Ukrainës.

Ndërkohë, nga zhvillimet e fundit në Ukraine, The Guardian raporton se një burrë shpërtheu një pajisje eksplozive ndërsa rojet kufitare po kontrollonin dokumentet në një stacion treni në veri të Ukrainës të premten, duke vrarë veten dhe tre gra, njoftoi Shërbimi Shtetëror i Rojeve Kufitare.

Në një deklaratë thuhej se 12 persona të tjerë u plagosën nga shpërthimi në stacionin e Ovruchit, pranë kufirit me Bjellorusinë, dhe se një roje kufitare ishte mes të vrarëve, të cilët ishin të moshave 29, 58 dhe 82 vjeç.

Burri që shpërtheu pajisjen eksplozive ishte një 23-vjeçar banues në Kharkiv, në verilindje të Ukrainës, i cili së fundmi ishte ndaluar për përpjekje për të kaluar kufirin, thuhej më tej.

Në deklaratë nuk përmendej asnjë lidhje e mundshme me luftën e Rusisë në Ukrainë.