Disa të vrarë në një sulm terrorist në kompaninë turke të hapësirës ajrore
Ministri i brendshëm i Turqisë e ka quajtur “sulm terrorist” shpërthimin dhe sulmin vdekjeprurës në selinë e kompanisë kombëtare turke të hapësirës ajrore, Tusaş, jashtë Ankarasë, duke thënë se ka njerëz të vdekur dhe të plagosur në vendngjarje.
Shpërthimi, i cili ndodhi jashtë ndërtesës në orën 4 pasdite të mërkurën, u raportua se u shoqërua edhe me të shtëna armësh në afërsi, shkruan The Guardian.
“Një sulm terrorist u krye ndaj objekteve të Tusaş në Kahramankazan, Ankara. Fatkeqësisht, kemi të vdekur dhe të plagosur,” postoi në X ministri i brendshëm, Ali Yerlikaya.
Rrethanat e sakta të shpërthimit dhe të shtënave që pasuan mbeten të paqarta, me disa media që sugjeronin se mund të ishte një sulm vetëvrasës.
Sipas raporteve fillestare, sulmi u krye nga disa sulmues të armatosur që arritën në vendngjarje me taksi, ndërsa pamjet nga televizionet lokale dukeshin se tregonin individë të veshur me të zeza dhe me çanta shpine në rrugët pranë ndërtesës, duke qëlluar mbi kalimtarët.
Tusaş është një nga kompanitë më të rëndësishme të mbrojtjes dhe aviacionit në Turqi. Sipas gazetës turke Hürriyet, stafi në ndërtesë u dërgua në strehimore për arsye sigurie.
Shpërthimi ndodhi ndërsa një panair i rëndësishëm tregtar për industrinë e mbrojtjes dhe hapësirës ajrore po zhvillohej në Stamboll, i cili këtë javë u vizitua nga diplomati më i lartë i Ukrainës.
