Burri i liderës së arrestuar të Parlamentit Evropian e pranoi: Morëm ryshfet nga Katari

“Të gjitha këto i bëra për para që nuk më duheshin”, janë fjalët me të cilat Francesco Giorgi, bashkëshorti i eurodeputetes greke Eva Kaili dhe një nga katër të arrestuarit në një skandal të madh korrupsioni, që po hetohet nga hetuesit belgë, ku pranoi përfshirjen e tij në të ashtuquajturat Katargate. Siç shkruan gazeta italiane La Repubblica, Giorgi ka folur para prokurorëve në Bruksel dhe ka pranuar se “veproi në mënyrë të paligjshme” dhe kërkoi falje.

Në detaje të reja të zbardhura, gazeta italiane shkruan se Giorgi kërkoi që bashkëshortja e tij, nënkryetarja e sapo shkarkuar e Parlamentit Europian, të lirohej nga burgu për të qenë me vajzën e tyre dyvjeçare. Kujtojmë se prokurorët belgë kanë muaj që po punojnë për këtë me dyshimin se një vend i Gjirit po përpiqet të ndikojë në vendimet në Bruksel. Një burim i njohur me hetimin pohon se bëhet fjalë për shtetin pritës të Botërorit aktual, Katarin. Kaili mohon të ketë marrë para nga Katari, ashtu si edhe zyrtarët e Katarit.

Giorgi i tha kreut të hetimit, prokurorit belg kundër korrupsionit, Michael Cles, se ai ishte anëtar i një organizate të lidhur me Marokun dhe Katarin, me qëllim që të ndikonte në marrëdhëniet e tyre me Evropën. Ai pretendon se organizata drejtohej nga ish-deputeti italian Pierre Antonio Panzeri. Në Parlamentin Evropian, Giorgi kishte rolin e këshilltarit për rajonin e Lindjes së Mesme dhe Afrikës së Veriut dhe themeloi organizatën joqeveritare Fight Impunity, qëllimi i së cilës është "të promovojë llogaridhënien si një shtyllë qendrore të arkitekturës së drejtësisë ndërkombëtare".

Si u afruan Giorgi dhe Panzeri?

Sipas La Repubblica, lidhja e Giorgi me Panzerin ka 13 vite më parë. “I kërkova të më merrte në stafin e tij. Prej aty nisi një bashkëpunim i gjatë”, u tha Giorgi prokurorëve.

Me kalimin e viteve, Panzeri u bë mentori i Giorgit dhe ai ishte ndihmësi i tij që u fut dalëngadalë në qarqet politike. “E kam bërë për para, edhe pse nuk më duheshin paratë, paratë ishin të destinuara vetëm për mua dhe Panzerin, askënd tjetër”, shtoi ai. Kujtojmë se hetuesit belgë gjetën 150 mijë euro në shtëpinë e nënkryetarit Kaila, ndërsa 600 mijë të tjera u gjetën në valixhen që mbante vjehrri i Giorgit kur ai doli me nxitim nga hoteli në lagjen evropiane të Brukselit.

Giorgi u tha hetuesve se ishte penduar për gjithçka që kishte bërë, shkruan një gazetë italiane dhe se ndihej i lehtësuar pasi hoqi nga vetja këtë barrë. "Unë thjesht e gjeta veten në diçka më të madhe se vetja. Unë u verbova dhe u ngarkova me një borxh moral ndaj Panzerit", u tha ai hetuesve. Hetuesit po përpiqen të përcaktojnë nëse ka një lidhje midis eurodeputetëve të arrestuar dhe emisarëve të Katarit dhe marokenit. Kur hetuesi e pyeti nëse kishte lidhje, Giorgi u përgjigj se nuk e dinte.

Giorgi mori me vete dy eurodeputetë

Tashmë ai mbetet në burg, ashtu si Panzeri, por edhe dy eurodeputetë të tjerë aktivë nga grupi i socialistëve europianë, belgu Marc Tarabella, shtëpia e të cilit u kontrollua nga policia dhe italiani Andrea Cozzolini. Tarabella mohon të gjitha akuzat, tha avokati i tij për gazetën belge Le Soir, e cila fillimisht shpërtheu historinë e skandalit të korrupsionit, ndërsa Cozzolino nuk pranoi t'i përgjigjet një pyetjeje nëse ai kishte marrë para apo dhurata.

Pas gjithçkaje që ndodhi, eurodeputetët kërkuan që lobuesve të Katarit t'u ndalohet qasja në Parlamentin Evropian dhe të pezullohet e gjithë puna për vendimet legjislative që lidhen me Katarin deri në përfundimin e këtij hetimi. /Nacionale/