Bideni paraqet propozim për kufizimin e mandateve në Gjykatën Supreme
Presidenti i Shteteve të Bashkuara, Joe Biden, do të paraqesë një propozim të pritur gjatë për ndryshime në Gjykatën Supreme, duke i bërë thirrje Kongresit që të vendosë kufizime mandati dhe një kod të etikës për nëntë gjykatësit e kësaj gjykate. Ai gjithashtu po i shtyn ligjvënësit që të ratifikojnë një amendament kushtetues që do ta kufizonte imunitetin presidencial.
Shtëpia e Bardhë të hënën dha hollësi të propozimit të Bidenit për Gjykatën Supreme, një i tillë që duhet se do të ketë pak gjasa për t’u miratuar nga Kongresi i ndarë në dy grupe të ngushta, kur kanë mbetur vetëm edhe 99 ditë deri në ditën e zgjedhjeve presidenciale, raporton agjencia “Associated Press”.
Prapëseprapë, demokratët shpresojnë se propozimi do të ndihmojë për t’i përqendruar votuesit, kur ata do t’i shqyrtojnë zgjedhjet e tyre në garën e ngushtë të zgjedhjeve. Kamala Harris, që pritet të jetë kandidate e demokratëve për presidente, është munduar që ta paraqesë garën e saj kundër republikanit Donald Trump si “zgjedhje mes lirisë dhe kaosit”.
Shtëpia e Bardhë po mundohet që ta qetësojë zemërimin në rritje në mesin e demokratëve për Gjykatën Supreme, ku ekziston shumicë konservatore 6 me 3, pasi ky organ ka lëshuar opinione që kanë rrëzuar vendime kyçe rreth të drejtës për abort dhe kompetencave rregulluese federale.
“Unë kam respekt të madh për institucionet tona dhe ndarjen e pushtetit” – argumentoi presidenti Biden në një opinion të publikuar në gazetën “The Washington Post”. “Ajo që po ndodh tani nuk është normale dhe ajo e minon besimin e publikut në vendimet e gjykatës, përfshirë ato që i prekin liritë personale. Ne tani qëndrojmë në një shkelje” – shkroi ai.
Presidenti planifikon që të flasë më vonë të hënën për propozimin e tij gjatë një fjalimi në bibliotekën presidenciale në Austin të Teksasit për ta shënuar 60-vjetorin e Aktit të të Drejtave Civile.
Bideni po bën thirrje që të shfuqizohen emërimet e gjykatësve për tërë jetën. Sipas tij, Kongresi duhet të miratojë legjislacion për themelimin e një sistemi në të cilin presidenti do të emëronte një gjykatës për çdo dy vjet e i emëruari do të shërbente 18 vjet në Gjykatën Supreme./Nacionale
