A po ‘mbijeton’ armëpushimi në Gaza?
Një armëpushim i ndërmjetësuar nga SHBA në Gaza duket se i ka mbijetuar provës së parë të madhe, pasi Izraeli dhe Hamasi konfirmuan përkushtimin e tyre ndaj marrëveshjes pas vrasjes së dy ushtarëve izraelitë në enklavë të dielën, gjë që shkaktoi një valë sulmesh ajrore, shkruan CNN.
Forcat e Mbrojtjes të Izraelit (IDF) thanë në një deklaratë se do të fillojnë një “zbatim të rinovuar” të armëpushimit sipas udhëzimeve të drejtuesve politikë.
Hamasi dhe krahu i tij ushtarak, Brigadat Al-Kasam (AQB), deklaruan të dielën në mëngjes se mbeten të përkushtuar ndaj armëpushimit dhe mohuan çdo përfshirje në sulmin ndaj forcave izraelite.
Ky përkushtim i shpallur ndaj armëpushimit vjen ndërkohë që arkitektët kryesorë të marrëveshjes, Steve Witkoff dhe Jared Kushner, pritet të mbërrijnë në rajon, sipas burimeve të njohura me planifikimin, ndërsa administrata Trump po përgatitet të zbatojë fazën tjetër të marrëveshjes.
Zëvendëspresidenti JD Vance gjithashtu pritet të udhëheqë një delegacion amerikan në Izrael këtë javë, sipas burimeve të njohura me planet, i tha CNN-it.
“Administrata mbetet e përqendruar në zbatimin e marrëveshjes së paqes dhe po punojmë në mënyrë energjike me partnerët tanë për ta bërë këtë. Nuk do të japim detaje mbi bisedimet diplomatike private që janë në vijim,” tha një zyrtar amerikan për CNN.
Më herët të dielën, Izraeli kreu një sërë sulmesh në të gjithë Gazën pasi akuzoi Hamasin për një sulm që vrau dy ushtarë të IDF – majorin Yaniv Kula, 26 vjeç, dhe rreshterin Itay Yavetz – duke shënuar herën e parë që trupat izraelite janë vrarë në Gaza që nga fillimi i armëpushimit.
Sulmet izraelite vranë të paktën 44 persona në disa pjesë të Gazës të dielën, sipas të dhënave nga spitalet e Gazës.
Të dyja palët, si Hamasi ashtu edhe IDF, fajësuan njëra-tjetrën për shkeljen e armëpushimit.
Pamje paniku u shfaqën në Gaza gjatë sulmeve, ku turma njerëzish u panë të mbledhur pranë spitalit al-Aksa ndërsa të plagosurit po silleshin me urgjencë në ambientet e tij.
“Ne po rrinim në një kafene, duke pirë çaj e kafe, dhe papritur dëgjuam lajmin — ishin goditur dhe bombarduar, dhe të gjithë u vranë. Kjo është gjithçka që ndodhi,” tha Sallih Salman, vëllai i njërit prej palestinezëve të vrarë, për agjencinë Reuters.
